Ferðalangur

Að komast frá Stansted inn í London

Uppfært október 2010:

Það er gott út af fyrir sig að vera komin til Stansted, en síðan er að velja ferðamáta inn í borg ef ætlunin er ekki að gista í nágrenni flugvallarins. Það er óneitanlega freistandi að velja Stansted Express lestina sem tekur aðeins um 45 mín til Liverpool Station, en eins og gengur og gerist er það dýrasti kosturinn fyrir utan að taka hreinlega leigubíl. Miðinn fram og til baka kostar 18.80 pund aðra leiðina (október 2010) og 26.70 pund ef miðinn er keyptur á netinu.  Einnig eru farmiðar til sölu í flugvélum t.d. hjá Iceland Express og Ryanair.

Nokkur helstu lágfargjaldaflugfélög

Uppfært október 2010:

Þau lágfargjaldaflugfélög sem ég hef haft kynni af eru eftirfarandi:

• Air Berlin
• Ryanair
• EasyJet
• Germanwings

Það er vissulega Iceland Express að þakka að það er hægt að nýta sér áætlunarflug þessara flugfélaga, því forsenda þess er að komast t.d. til Stansted flugvallar eða Gatwick rétt fyrir utan London og nýta sér svo tilboð lágfargjaldaflugfélaganna þaðan til ótal áfangastaða innan Evrópu. Einnig til Frankfurt Hahn svo dæmi séu nefnd.

Með svolítilli útsjónarsemi má ná nokkuð hagstæðum fargjöldum þó það hafi nokkuð breyst.

Whichbudget.com

Whichbudget.com er góður vefur fyrir þá sem vilja spá og spekúlera í lágfargjaldaflugfélögum. Vefurinn heldur utan um upplýsingar yfir 100 lágfargjaldaflugfélag í 179 löndum. Hægt er að velja hvaðan eða hvert fólk vill fljúga og skoða hvaða möguleikar eru fyrir hendi.

Uppfært október 2010:

Munið bara að skoða hvar flugvellir eru staðsettir áður en pantað er - þeir eru stundum á stöðum sem dýrt er að ferðast til og frá... það þarf að taka með í reikninginn. Einnig hvaða reglur gilda um farangur, því algengt er að rukkað sé sérstaklega fyrir farangur sem tékkaður er inn.

Undirbúningur ferðar

Fyrir þá sem eiga erfitt með að storma af stað til nýrra staða án þess að hafa lesið sér til koma hér nokkrar ábendingar. Allir Íslendingar hafa aðgang að alfræðibókinni Britannica Online (virkar einungis innan Íslands) og þar er að finna grunnupplýsingar um flesta staði sem hægt er að hugsa sér. Einnig sögulegar upplýsingar ef fólk vill.

Bólusetningar?

Almennt gildir að við þurfum ekki að hafa áhyggjur af bólusetningum vegna ferða til Evrópulanda. Það er hins vegar gott að vita af vef Landlæknisembættisins en þar er að finna fróðleik um ásamt ýmsum hollráðum fyrir ferðafólk.

Uppfært október 2010:

Einnig er hægt að leita til Ferðaverndar til að fá bólusetningar og upplýsingar fyrir Ferðamenn.