Ferðalangur

Bændagisting í Toscana - nálægt Lucca

Það barst skemmtileg ábending um "bændagistingu" á Ítalíu, rétt hjá bænum Bagni di Lucca og í um 25 km fjarlægð frá borginni Lucca (og 50 km frá Pisa). Staðurinn, sem er nánast nýr, heitir La Torre (turninn) og stendur í afskaplega fallegu umhverfi uppi í sveit. Um er að ræða nokkrar íbúðir, misstórar (42 til 76 fermetrar) og hýsa 2-4. "La Torre" fær afar góða umsögn íslenskrar fjölskyldu sem þarna dvaldi.

Á staðnum er sundlaug (sölt - ekkert klór!) boccia, leikvöllur fyrir börn, göngustígar, fjallahjól og hægt að fá námskeið í ítalskri matreiðslu ásamt vínsmökkun. Hljómar vel, ekki satt? Nánari upplýsingar á http://www.agriturismolatorre.it/ - og netfangið: info@latorreagriturismo.com.

Ryanair flýgur frá London Stansted til Pisa.
Sjá einnig: Ítalía - Yfirlit.

Zug, Zugersee og nágrenni - Sviss

Það er svolítið gaman að heimsækja staði sem ekki er alltaf verið að hampa í auglýsingum.

Borgin Zug (ca. 22.000 íb.), fyrir sunnan Zürich, er höfuðborg kantónunnar Zug og stendur við norðausturhluta Zugersee.

Skattaparadísin Zug

Í Zug hafa höfuðstöðvar sínar mörg stórfyrirtæki sökum þess hve umhverfið er þeim "skattvænt" og þó að það sé dýrt að búa á staðnum, dýrt að lifa, þá borga íbúarnir sömuleiðis lága  skatta. Þetta er raunar ríkasta kantónan í Sviss og tekjur á hvern íbúa eru litlum 70% hærri en landsmeðaltalið...

World Factbook

   Eitt af mínum uppáhalds ferðatólum er vefsíðan World Factbook sem gefin er út af CIA, hvorki meira né minna... - Þar er á einfaldan hátt hægt að fletta upp einstökum löndum og fá upplýsingar um ýmsar staðreyndir. T.d. um fólksfjölda, landfræðilega hluti og stjórnarfar. 

Einnig er þar að finna upplýsingar um þjóðfána og hægt að gera samanburð milli landa á ýmsum atriðum.

Ómissandi síða fyrir þann sem vill afla sér fjölbreyttra upplýsinga um landið sem á að heimsækja.

"Worldatlas"

Hér er mjög fín síða: http://worldatlas.com/ þar sem hægt er að skoða yfirlitskort af hvaða heimsálfu/landi sem er - kannski ekki afskaplega ítarleg, en engu að síður skemmtileg.

Rust - storkar og vín

Það er ekki víst að margir hafi lagt leið sína til Rust - minnstu borgar í Austurríki (1700 íbúar). En það gleður svo sannarlega hjörtun, stór og smá, að kíkja þangað því þar gefur að líta storkahreiður á nánast hverju húsþaki. Eitthvað sem við Íslendingar sjáum ekki á hverjum degi. Enda er bærinn kallaður "borg storkanna og eðalvínsins".

Þessi litli, notalegi og fallegi bær er einn af vinsælustu viðkomustöðum í  Burgenland héraðinu í Austurríki.  Hann stendur við bakka Neusidlersee, sem er stöðuvatn á mörkum Austurríkis og Ungverjalands og þar er m.a. hægt að fara á seglbretti, í siglingar eða bara njóta sólar á góðum degi.

Seefeld - “Ein Prosit der Gemütlichkeit…”

Ef þú átt leið um Austurríki, nánar tiltekið um Týról – þá máttu ekki láta hjá líða að koma við í bænum Seefeld.

Þessi bær er sannkallaður unaðsreitur fyrir göngugarpa, hjólagarpa og alla þá sem kunna að láta sér líða vel í smærri bæjum. Það tekur aðeins um hálftíma að aka til Seefeld frá Innsbruck.

Og hvar á að gista? Ah…. ef pyngjan er ekki þess léttari, þá skal játast að sjaldan hef ég  komið inn á skemmtilegra hótel en Die Post – kannski vegna þess að innréttingar og herbergin öll eru svo skemmtilega austurrísk – hlýleg og falleg. Þjónustan í toppi líka.  Hótelið stendur nánast alveg  í miðbæ Seefeld (já - og frábært salathlaðborð!)

Veður á skíðaslóðum í Dólómítafjöllum

Uppfært október 2010:

Í framhaldi af klausum um skíðasvæði í Austurríki og á Ítalíu í Dólómítafjöllunum, kom þessi fína ábending um vefsíðu sem gefur upp veður á ýmsum skíðastöðum þar:

Dolomiti Superski

Einnig þessi stórgóða síða frá BBC um "snjófréttir".... http://www.bbc.co.uk/weather/sports/snowsports/snownews.shtml

Pizza - hernaðarleyndarmálið

Ég fylltist miklu stolti nú fyrir nokkrum dögum þegar ég hélt upp á afmæli dóttur minnar sem ekki er í sjálfu sér í frásögur færandi. En þegar ég komst að raun um að vinkonuskarinn beið með tilhlökkun eftir heimabökuðu pizzunni minni og sporðrenndi ótölulegum fjölda pizzusneiða með sælubros á vör, þá lá nærri við að ég færi að montast... því hvorki fyrr né síðar hefur nokkur maður beðið eftir neinu úr mínu eldhúsi... nema þegar haldin eru afmæli með þessari tilteknu pizzu. Er nema von að maður gleðjist!

En því er ég nú að masa þetta, að ég er að hugsa um að ljóstra upp þessari ágætu uppskrift  Þar með gef ég ykkur hinum færi á að öðlast nokkra frægð, tja að minnsta kosti út að næsta götuhorni!

Verona - rómantísk og stutt í allar áttir

Það er eitthvað ótrúlega notalegt við borgina Verona. Hún er allt í senn -  rómantísk, söguleg, falleg, mátulega sveitaleg og hefur þann góða kost að vera í námunda við aðra merka og fallega staði svo sem Feneyjar, Gardavatnið og Mílanó.

Það er enginn vandi að eyða nokkrum dögum í Verona, þó hægt sé að komast yfir töluvert á 1-2 dögum. En til þess að upplifa andrúmsloft borgarinnar, þá er gaman að dvelja þar í nokkrar nætur. 

London "Stand-ups"

Góður kunningi minn skrapp til London og heimsótti skemmtilegan "stand-up" klúbb, The Comedy Store og skemmti sér konunglega.  Staðinn heimsækja vel yfir 3500 manns í hverri viku og miða er hægt að bóka yfir netið ef menn kjósa.

Sjá einnig:
Bretland - Yfirlit

Á skíðum... í Austurríki

Skíðastaðurinn Zell am See í Austurríki er eitt af þekktustu skíðasvæðum þar í landi.

Bærinn Zell, sem telur um 10.000 íbúa, stendur í Prinzgau dalnum í Salzburgerland, milli Schmittenhöhe og vatnsins sem kennt er við Zell.

Í framhaldi af því er hægt að skoða síðuna http://www.skiaustria.com/ en þar fæst ágætt yfirlit yfir Zell Am See og fleiri vinsæl skíðasvæði í Austurríki. Í Zell Am See er ekki bara hugsað um skíðafólkið – snjóbrettaiðkendur fá líka ýmsilegt við sitt hæfi og gestum er vel sinnt að lokinni skíðaiðkun á daginn!

 

Sjá einnig:

Austurríki - Yfirlit

Á skíðum skemmti ég mér...

Hvert eru Íslendingar að fara á skíði?

Jú, tveir staðir koma meðal annars upp í hugann og báðir í ítölsku Dólómítunum. Annars vegar Madonna di Campiglio sem stendur í dalnum Val Rendena í vesturhluta Trentino héraðsins, rétt við rætur Brenta-Dólómítanna. Þetta ku vera einn af bestu stöðum til skíðaiðkana í Ölpunum og við flestra hæfi, hvort sem um er að ræða byrjendur eða lengra komna. Þarna er ekki síður góð aðstaða fyrir þá sem iðka snjóbrettaíþróttina. 

Karnival í Feneyjum

Feneyjabúar gera sér árlega glaðan dag á karnivalshátíð sem ávallt er tileinkuð ákveðnu þema. Árið 2004 var þemað "Orient Express" en 2005  "Mask Parade and Events in Theatre".  Hátíðahöldin voru endurvakin skömmu eftir 1980 eftir um það bil 2ja alda hlé og standa yfir í 12 daga. Þau fara að mestu fram á 12 stöðum í Feneyjum þar sem finna má eitthvað fyrir alla; þjóðlegar uppákomur, markaði, tónleika, böll og atriði fyrir börnin svo eitthvað sé nefnt. 

Grímurnar frægu frá Veneyjum eru tákn hátíðahaldanna og á miðöldum faldi gríman ýmis konar háttsemi manna sem í dag þætti trúlega óviðeigandi í meira lagi. Ræturnar eru ævagamlar. Einhvern tímann las ég frásögn um karnivalhátíðina á miðöldum þar sem hátíðahöldin stóðu yfir í fleiri vikur og allt sem hét lög og reglur var að mestu lagt til hliðar. Meira að segja nunnuklaustrin fengu heimsóknir grímuklæddra manna...

Lesa má dagskrá hátíðahaldanna á www.carnivalofvenice.com.

Louvre á netinu

Fyrir þá sem hyggja á skoðunarferð um Louvre safnið í París - hvort heldur í raunveruleikanum eða einfaldlega bara í sófanum heima er upplagt að kynna sér Louvre á netinu.

 
Á vefnum er ógrynni upplýsinga. Hægt er að lesa um sögu Louvre safnsins þar sem stiklað er á stóru um þessa 800 ára gömlu byggingu sem hýst hefur safnið undanfarnar tvær aldir.  Einnig er hægt að fara n.k. “sýndarferð” um safnið (virtual tour). Ferðinni er heitið í gegnum hin ýmsu söfn Louvre, þar sem meðal annars er hægt að sjá egypska fornmuni og einnig muni frá tímum Forn-Grikkja, Rómverja og Etrúska.

 

Sérlega skemmtilegt er að skoða valin verk (Selected Works) frá mismunandi tímabilum með skýringum  -  t.d. Monu Lisu, öðru nafni “La Gioconda”, eftir Leonardo da Vinci og verk eftir Raffaello.

 

Á vefnum eru að sjálfsögðu praktískar upplýsingar um sérsýningar sem í gangi eru, opnunartíma, miðaverð og fleira. Þetta er vefur sem er í senn bæði skemmtilegur og fræðandi.

 

Ofurlítið heilræði:
Ef safnið er heimsótt í París, mæli ég með því að taka einungis fyrir hluta þess í einu - þetta er svo viðamikið safn að það er ekki nokkur leið að skoða það af viti á 2-3 tímum.

Athyglisverð bók fyrir ferðalanga: The Travel Book

The Travel Book heitir ný bók (september 2004) eftir Roz Hopkins sem ætti að höfða til ferðalanga. Þetta er heljarinnar doðrantur, 444 síður með 1200 myndum og er hvorki meira né minna en uppflettirit fyrir öll lönd veraldar, 230 talsins!  Það eru höfundar Lonely Planet bókanna sem þarna hafa sett saman tvær blaðsíður um hvert einasta land.

Svo vitnað sé í Brad Hooper, frá American Library Association, þá er í bókinni fjallað  um hvað eigi að upplifa í hverju landi til að kynnast því sem best, hvaða bækur eigi að lesa áður en ferðin hefst, hvaða matur og drykkur er einkennandi fyrir hvert land og hvaða tónlist á að hlusta á í tengslum við ferðina. Síðast en ekki síst er nefnt hvaða óvæntu hlutir bíða ferðalangsins í viðkomandi landi.

Þessi bók fær afar góða dóma og þó hún sé greinilega ekki ætluð til að troða ofan í ferðatösku þá er hér á ferð spennandi bók í ferðahandbókasafnið!

Lonely Planet ferðahandbækur

Það er vel hægt að mæla með ferðahandbókum frá Lonely Planet. Sagt er frá héruðum og borgum/þorpum hvers lands í nokkuð samþjöppuðu formi og hverjum stað fylgja leiðbeiningar um gististaði, veitingastaði og það helsta sem er að sjá og margt fleira. Einnig fylgja léttir og skemmtilegir litlir kaflar um ýmis sérkenni, siði, sögu eða merkar perónur á víð og dreif í bókunum sem gefa efninu skemmtilegan blæ.

Heimsminjaskrá UNESCO

Uppfært október 2010:

Hvaða staðir eru á heimsminjaskrá Unesco? Eftir að Þingvellir komust á heimsminjaskrána 2004 og Surtstey árið 2008 er ekki ólíklegt að einhverjir hafi tekið að velta því fyrir sér hvaða staðir aðrir séu á skránni. Á upplýsingavef heimsminjaskrárinnar eru þessir staðir flokkaðir eftir löndum.

Myndin sem hér fylgir er af Piazza del Duomo í Pisa á Ítalíu, sem komst á heimsminjaskrá Unesco 1987.

Ferðamálaráð - upplýsingamiðstöðvar

Uppfært október 2010:

Fyrir þá sem vilja fletta beint upp ferðamálaráði tiltekins lands er gott að fara á Tourism Offices Worldwide Directory. Þar er hægt að fá lista yfir upplýsingamiðstöðvar á vegum hins opinbera, sem eiga að veita almenningi ókeypis og hlutlausar upplýsingar um ferðamál.

Sjá einnig: Undirbúningur ferðar

Netkaffi - Internet Cafe - Cybercafe

Uppfært október 2010:

Það er getur verið gott að komast á netið með auðveldum hætti á ferðalagi erlendis. Hér koma tenglar þar sem hægt er að leita eftir netkaffi eftir löndum og borgum ... - mér hefur ekki tekist að finna síðu sem ég er alveg ánægð með, en læt þessar flakka.

• http://www.cybercafes.com/
• The Cybercafe Search Engine
• EuroCyberCafes

Hvar er næsti hraðbanki?

Flestir hafa trúlega lent í því að þurfa að finna hraðbanka. Yfirleitt er allt morandi í kringum mann af hraðbönkum... gott ef ekki bara á hverju götuhorni... þar til þarf að nota þá! Oftast leysist það farsællega með aðstoð hjálpsamra vegfarenda en stundum er gott að vita fyrirfram hvar hraðbankana er að finna. Hér er lítið tól,  ATM Locator, sem getur svo sannarlega hjálpað til.

Heilsan á ferðalagi

Uppfært október 2010:

Hvernig get ég komist hjá óþægindum meðan á flugferð stendur? Hvernig er best að taka á sjóveiki og bílveiki? Hvað með ófrískar konur og ferðalög?

Ein allra vandaðasta síða sem ég þekki um þessi efni og mörg fleiri er upplýsingavefur Medlineplus frá National Library of Medicine (USA) sem vísar á afar vandaða tengla um hin ýmsu vandamál sem geta tengst ferðalögum. Þær síður eru allar á ensku.

Varðandi upplýsingar á íslensku má leita á Doktor.is og almennar ráðleggingar á www.landlaeknir.is.

Sjá einnig upplýsingar um Evrópska sjúkratryggingakortið og bólusetningar fyrir ferðamenn.

Hátíðisdagar víða um heim

Það getur verið býsna bagalegt að vera á ferð erlendis og vera e.t.v. búinn að skipuleggja heimsóknir í söfn, eða jafnvel verslunarferðir og lenda svo á hátíðisdegi þar sem allt er lokað. Þetta getur líka skipt máli varðandi umferð á hraðbrautum og fleira. Hér er vefsíða þar sem fletta má upp hátíðis- og frídögum fjölda landa.

• http://www.earthcalendar.net/

"Country profiles" frá BBC

Ég hef lengi dáðst að mörgu sem komið hefur frá BBC og hér kemur enn eitt dæmið um vel gerðan hlut hjá þeim. Vefurinn BBC Country Profiles er afar fjölbreyttur og skemmtilegur. Þar er hægt að velja lönd frá öllum heimsálfum og fá fróðlegt yfirlit um það sem er að gerast í hverju landi en einnig sögulegt yfirlit sem er uppfært um leið og dregur til tíðinda.

Á vefnum er hægt að hlusta á þjóðsöng hvers lands og stundum eru tenglar í myndbandsbúta frá BBC.

Hvert einasta yfirlit skiptist í fjóra hluta: Overview, Facts, Leaders og Media. Einnig er hægt að smella á sérstakt yfirlit Timeline þar sem helstu atburða úr sögu landsins er getið í tímaröð.

Skoðið til gamans Ítalíu frá BBC - Country Profiles.