Ferðalangur

Vínarborg - "Að innan"

Það er líklegt að þeir sem leggja leið sína til Vínarborgar, láti ekki nægja að skoða borgina "utan frá", heldur hafi líka áhuga á að sækja tónleika, fara í Óperuna, líta inn í Keisarahöllina, skoða glæsileg híbýli í Schönbrunn höllinni ... svo eitthvað sé nefnt.

Hótel og ýmiskonar gisting í Vín

Mér hefur reynst vel að byrja dvöl í Vínarborg á því að heimsækja upplýsingamiðstöð ferðamála: Tourist Info Vienna, Vienna 1, Albertinaplatz / Maysedergasse, í grennd við Ríkisóperuna. Opið daglega frá kl. 9 - 17. Þar er hægt að fá margskonar bæklinga og hægt að gera sér grein fyrir hvað er á döfinni.

Hvað er á döfinni? Hvenær og hvar?

Það er nauðsynlegt að vita hvað er á döfinni á þeim slóðum sem ætlunin er að heimsækja. Eru einhverjar hátíðir í gangi á þeim tíma sem þú ætlar að ferðast? Eitthvað sem gaman væri að sjá og fylgjast með? Eða forðast? :-) Þessu má fletta upp á eftirfarandi slóð:

http://www.whatsonwhen.com/

Cappuccino... bara fyrir hádegi!

Ef ferðalangar til Ítalíu vilja forðast að gera sig að athlægi í augum "innfæddra" - er ráð að biðja aldrei um "un cappuccino" nema fyrir hádegi.... tja... svona framundir kl. 11.00. Cappuccino drekka menn helst aldrei eftir hádegi og Ítalir fara oft ekkert í felur með hneykslan sína ef út af því er brugðið :-).

Vínarborg - Venia - Vindobona

Fyrir þá sem vilja fljúga til Vínar á eigin vegum er hægt að með lágfargjaldaflugfélögum eins og t.d. Air Berlin frá London.

Hótel og ýmiskonar gisting í Vín

Vínarborg á sér langa og merka sögu eins og raunar allar hinar gömlu og grónu evrópsku borgir sem Íslendingar og aðrir njóta svo mjög að sækja heim.

Heimilisskipti - Íbúðaskipti

Margir hafa prófað íbúðaskipti í sumarfríinu. Einhverjir auglýsa í dagblöðum, eða jafnvel á póstlistum ýmissa fagfélaga. Enn aðrir nýta sér vefsíður sem sérstaklega eru upp settar í þessum tilgangi og auglýsa/miðla upplýsingum milli áhugasamra fyrir ákveðna þóknun.

Þeirra stærstar eru:

• Homeexchange.com
• Intervacus.com (aðalllega Evrópa)
• Homelink.org

Ferðalangur hefur nýtt sér þetta og hikar ekki við að mæla með þessari reynslu. Þetta er einstakt tækifæri til að dvelja í öðru landi án þess að leggja í alltof mikinn kostnað.

Uppfært nóv. 2010

Sardinía

Sardinía (Sardegna) hefur löngum verið sveipuð svolitlum ævintýraljóma. Eyjan hefur verið einangruð í gegnum tíðina og íbúarnir (Sardi) átt sér sína sérstöku menningu. Kannski ekki ósvipað Vestmannaeyjum og Íslandi… - en Sardiníubúar kalla Ítalíu einfaldlega "meginlandið". Íbúarnir inni í landi á Sardiníu tala enn sína sérstöku latínu-skotnu mállýsku og halda fast við forna siði og venjur.

Búdapest

Orð eins og virðuleiki og glæsileiki koma fyrst í hugann þegar minnst er á Búdapest. Ekki þarf annað en að standa um stund á Hetjutorginu (Hosök Tere) til að skilja þessi orð og finnast maður mega sín lítils… Kannski ekkert skrítið að Búdapest er gjarnan nefnd "París" Austur-Evrópu.

Lágfargjaldafélög fljúgja gjarnan til Búdapest frá t.d. London. 

Hótel í Búdapest

Rothenburg

Bærinn Rothenburg liggur á hinni svokölluðu "rómantísku leið" í Þýskalandi. Þetta er lítil perla og svo litrík að stutt stopp dugar vart til að komast yfir það sem gaman væri að sjá. Bærinn er einn af best varðveittustu miðaldabæjum í Þýskalandi.

Hótel í Rothenburg

Riva del Garda

Riva del Garda er fyrsti "suðræni" staðurinn sem ferðamenn sjá þegar þeir koma til Ítalíu yfir Brennerskarðið (Brennero) og niður að Gardavatninu. Þessi nyrsti hluti vatnsins er frægur fyrir heiðan himinn og kristaltært vatn.

Gardavatnið - Lago di Garda

Gardavatnið  - Lago di Garda (sem eitt sinn hét Benaco) og umhverfi þess, er af mörgum talið eitt fallegasta landssvæði Ítalíu. Það liggur á Norður-Ítalíu, rétt við rætur Alpafjallanna. 

Vatnið, sem er stærsta stöðuvatn Ítalíu, er að mestu umlukið fjöllum en syðri endi þess snertir aðeins Pósléttuna. Gardavatnið er raunar ekki bara vatn, heldur leynast þar einnig litlar víkur, strandlengjur fyrir sólbaðsunnendur og eyjar.

Busabout.com

 Hér er skemmtilegur ferðamöguleiki fyrir þá sem vilja gjarnan ferðast um Evrópu á þægilegan en sjálfstæðan máta.  Busabout.com er fyrirtæki sem sér um áætlunarferðir með rútum um Evrópu. Hægt er að kaupa alls kyns "passa" sem gilda mislengi og kosta mismikið.

Auðvelt er að hoppa úr á leiðinni, gista og taka rútuna aftur síðar.

Uppfært nóv. 2010

Prag - alveg einstök

Prag er "stemming". Prag er menning. Prag er list. Prag er …. engu lík. Þangað er hægt að  koma aftur og aftur og njóta hvers einasta andartaks. Borgin er þó ekki öll jafn falleg. Gangið aðeins út fyrir miðborgina og þá gefur að líta grámuskulegar íbúðablokkir sem minna á árin áður en "járntjaldið" féll.

Einhvern veginn hefur mér alltaf þótt Prag vera svo langt í burtu - en hið rétta er að það eru ekki nema 384 km milli München og Prag og 294 km milli Vínarborgar og Prag. Vegalengd sem lítill vandi er að fara á hluta úr degi.

Að koma til Prag

Ef komið er akandi til Prag frá t.d. Austurríki liggur leiðin í gegnum afskaplega fallegt, skógi vaxið landslag og akra. Vegirnir eru yfirleitt frekar mjóir og vart hægt að aka á meira en 80-90 km hraða.

Lágfargjaldaflugfélög eins og Ryanair og Easyjet fljúga gjarnan til Prag.

Gisting

Það er vægast sagt um margs konar gistingu að ræða, hótel af öllum stærðum, gerðum og gæðaflokkum í Prag. Einnig er oft hægt að leigja íbúðir á hagstæðu verði.

Helstu upplýsingar

Prague welcome
Óperan í Prag
Miðar á ýmsa viðburði í Prag

 

Gönguferðir - langar og stuttar

Gönguferðir erlendis verða sífellt vinsælli. Íslenskar ferðaskrifstofur bjóða gjarnan slíkar ferðir, t.d. vikuferðir, bæði með íslenskum og þarlendum fararstjórum. Sumir vilja hins vegar fara á eigin vegum og þá getur verið gott að byrja á Netinu og skoða möguleika og leiðarlýsingar.

Á upplýsingavef  European Ramblers Association er hægt að skoða kort og upplýsingar um lengri gönguleiðir, jafnvel gönguleiðir milli landa fyrir þá allra hörðustu.

Peak to Peak heitir ágæt síða sem haldið er úti af áhugasömum göngugarpi.

Vefir upplýsingamiðstöðva ferðamála í hverju landi, veita oftast einhverjar upplýsingar um gönguleiðir (walking, hiking, trekking o.s.frv.) sjá t.d. Tourism Offices Worldwide Directory eða yfirlit um einstök lönd hér á Ferðalangi. Einnig er hægt að senda þeim tölvupóst og biðja um að fá senda bæklinga um gönguferðir. Þannig má á ódýran hátt fá greinargóðar upplýsingar.

DiscoverItalia er fjölbreyttur vefur um Ítalíu og þar má finna lýsingar á ýmsum stuttum og löngum gönguleiðum.

Til er gott safn ferðahandbóka á ensku sem fjalla sérstaklega um vinsælar gönguleiðir í hverju landi fyrir sig:

• Gönguleiðir á Ítalíu
• Gönguleiðir í frönsku og ítölsku ölpunum
• Gönguleiðir í Frakklandi
• Gönguleiðir á Spáni
• Gönguleiðir í Austurríki
• Gönguleiðir í Sviss

Uppfært nóv. 2010

Að hjóla um Evrópu

Þegar leitað er að síðum á Netinu að upplýsingum fyrir þá sem vilja hjóla um Evrópu, er úr vöndu að ráða. Mikið er til af síðum frá alls kyns ferðaskrifstofum sem auglýsa skipulagðar hjólaferðir, en erfiðara að finna hlutlausar síður sem nýtast til almennra upplýsinga.  Sem dæmi um slíka síðu má þó nefna Trento bike pages sem er viðhaldið síðan 1994 af ítölskum áhugamanni um hjólreiðar og er ekki gefin út í gróðaskyni. Látið ekki "ófagmannlegt" útlit síðunnar villa um fyrir ykkur - þarna eru greinilega tenglar og upplýsingar um hjólreiðar í flestum löndum Evrópu. 

Handbækur

Cycling in Europe

 

Uppfært nóv. 2010

Feneyjar, borgin sökkvandi

Feneyjar, borgin sökkvandi, er með sérkennilegustu borgum Evrópu og jafnvel þótt víðar væri leitað. Það er merkileg tilfinning að ferðast um síki borgarinnar á bátum og virða fyrir sér mishrörlegar byggingar þar sem þær rísa upp úr vatninu og kjallararnir oft í hálfu kafi. Lyktin er sérstök, fellur ekki öllum, en er þó órjúfanlegur partur af því andrúmslofti sem umlykur Feneyjar. Borgin sekkur þó ekki í dag jafn hratt og áður, tekist hefur að einhverju leyti að stöðva þá þróun.

Hótel í Feneyjum
Ferðahandbækur um Feneyjar

Það er viturlegt að reyna að forðast Feneyjar um helgar að sumarlagi ef hægt er. Fólksfjöldinn getur þá orðið ansi þrúgandi og ef hitinn er mikill getur slík heimsókn orðið erfið ef ekki er að gáð. Gott er að hafa eitthvað á höfðinu í miklum hita og sól – það eru ekki vandræði með það í Feneyjum, því mikið er um sölutjöld og bása í grennd við Markúsartorgið með alls kyns höttum og höfuðfötum.

Sumarhús og íbúðir á Ítalíu

Það er afar vinsælt að leigja sumarhús eða íbúð á Ítalíu.

E-domizil  leigir út hús og íbúðir oft á afar hagstæðu verði, með nákvæmum lýsingum á staðsetningu og aðstöðu.

Vinsælasta héraðið er án efa Toskana, en ekki má gleyma að önnur héruð hafa líka sinn sérstaka sjarma, s.s. Umbria og Le Marche svo dæmi séu tekin í nágrenni Toskana.

Algengast er að húsin séu leigð út frá laugardegi til laugardags og það er auðvitað nauðsynlegt að hafa í huga áður en flugið er keypt. Það er gott að hafa landakort við hendina þegar staðsetningunni er velt fyrir sér eða góða síðu eins og ViaMichelin. Það er nefnilega gott að hafa það á hreinu hvort dvelja á uppi í sveit í rólegheitum, í grennd við markverða staði, í borgum eða bæjum. Þá skiptir einnig máli hvort bílaleigubíll er við hendina eða hvort reiða þarf sig á almenningssamgöngur.

Sjá einnig Ítalía - yfirlit.

Uppfært október 2010

Barcelona

Það er auðvelt að fljúga á eigin vegum til Barcelona frá London Stansted. Air Berlin og EasyJet fljúga beint til Barcelona og Ryanair flýgur til Girona. Frá Girona er aðeins rúmlega klst. ferð til Barcelona með rútu þar sem farið er út við Passeig Sant Joan.

Nóg er af hótelum á góðu verði t.d. frá Booking.com. Ferðalangur dvaldi í nokkra daga í miðju hverfinu El Raval, skammt frá La Rambla sem er aðalgöngugata Barcelona.

Í El Raval fer fram mikil uppbygging, mikil endurnýjun húsakosts og víða er verið að smíða og gera við hús. Þetta hverfi hafði áður ekkert sérstakt orð á sér, en það er mjög skemmtilegt að því leyti að þarna býr venjulegt fólk - ekki bara túristar... (hversu gáfulega sem það nú hljómar!). Á morgnana heyrðist í frúnum í kring kalla á milli húsa, krakkar léku sér í húsasundum og andrúmsloftið var einkar skemmtilegt.

Barcelona er feikna fjölbreytt borg og þar geta allir fundið eitthvað við sitt hæfi.

Hvað er um að vera í London?

Fyrir þá sem vilja fylgjast með því sem gerist í London, er snjallt að gerast áskrifandi að mánaðarlegu fréttabréfi sem heitir London Monthly og fá þannig beint í æð það sem um er að vera á söfnum, í kvikmyndahúsum, leikhúsum, allar sýningar, íþróttaviðburði og margt fleira. Meiriháttar upplýsingalind....

www.londonmonthly.com

Nice - Karnival að hefjast

Það líður að karnivalhátíðinni í Nice í Suður-Frakklandi en það hefst föstudaginn 13. febrúar n.k. (enginn hjátrúarfullur á þeim slóðum!) og stendur til 25. febrúar (2005). Þetta er einn helsti viðburðurinn yfir vetrartímann á Frönsku Rivierunni og borgin glæðist nýju lífi á meðan hátíðahöldin standa yfir. Óhætt er að segja að blóm séu í aðalhlutverki þessa daga enda borgin fræg fyrir blóm og blómarækt í héraðinu.

The British Museum

Internetið hefur marga kosti - og einn þeirra getur verið sá að gera ferðir á söfn enn áhugaverðari og meira spennandi en ella.

Heimasíða The British Museum í London, opnar fólki svo sannarlega leið inn í forna, löngu liðna tíma. Á henni er upplagt að átta sig á uppbyggingu þessa mikla safns, skipuleggja hugsanlega heimsókn,  skoða menningu frá mismunandi heimshlutum og fræðast.

Aðgangur að hefðbundnum sýningum í The British Museum er ókeypis.

The British Museum
Bretland - Yfirlit

Uppfært október 2010

Laterooms.com

Hér kemur skemmtileg hótelsíða, LateRooms.com - sem ég hef notað sjálf oftar en einu sinni og þá til að bóka hótel í London. Um 50.000 hótel taka þátt í að uppfæra upplýsingar varðandi herbergi "á síðustu stundu", þ.e. ekki mjög langt fram í tímann og þarna má oft finna mjög góð tilboð frá mörgum löndum.

Ýmist er hægt að bóka á netinu eða hringja og vitna þá í tiltekin númer sem fást á þessum síðum. Lesið því upplýsingarnar vel varðandi hvert hótel.

Athugið, varðandi hótel í London... að þessi í ódýrari kantinum eru oft án lyftu... og ég hef lent í að þræða þrönga stiga með níðþungar ferðatöskur upp á hanabjálka... svo biðjið sérstaklega um herbergi á neðri hæðum ef þess háttar líkamsrækt er ekki inni í myndinni!

Le Cinque Terre - Ítalía

Margir hafa eflaust heyrt talað um þjóðgarðinn Le Cinque Terre á Ítalíu og sumir hafa e.t.v. farið í gönguferð um svæðið. En hvað er þetta eiginlega?

Le Cinque Terre er svæði, ca. 40 km strandlengja í Lígúríuhéraði á norð-vestur hluta Ítalíu, sem á standa fimm lítil og ævagömul fiskimannaþorp (cinque = fimm, terre = jarðir, lönd).

Ef siglt er á bát meðfram þessu svæði má ýmist líta snarbratta kletta eða vínekrur í hlíðum og inn á milli leynast hellar og litlar afskekktar víkur. Þetta er ægifagurt svæði og engin tilviljun að það tilheyrir heimsminjaskrá Unesco. Heimsókn á þetta svæði er n.k. tækifæri til að líta inn í liðna tíð. Fyrir utan náttúrufegurð, er svæðið frægt fyrir vínframleiðslu sína (þið verðið að smakka Sciacchetrá!) og ýmis konar afurðir sem fengnar eru jafnt af landi sem úr sjó.