Istria (Istra) heitir þríhyrndur skagi sem gengur út í Adríahafið nyrst í Króatíu og syðst í Slóveníu. Þessi fallegi skagi er eitt vinsælasta ferðamannasvæði Króatíu og þangað hafa streymt gestir síðan á sjöunda áratug 20. aldarinnar til að heimsækja staði eins og Rovinj, Vrsar, Umag, Novigrad og bæinn Porec sem er einna vinsælastur af þeim öllum.
Gisting á Istriaskaganum
Hótel og gististaðir frá Venere
Stríðið milli þjóðarbrota gömlu Júgóslavíu hafði ekki bein áhrif á Istriuskaganum og ferðamannaiðnaðurinn blómstrar nú sem aldrei fyrr með nýuppgerðum hótelum þó margt bíði þess ennþá að verða gert.
Lífsviðurværi
Á Istriuskaganum hefur fólk einkum viðurværi sitt af vínrækt, ólívu- og maísrækt inni í landi, en við ströndina er það einkum ferðamannaiðnaður, fiskveiðar og verksmiðjur sem framfleyta íbúunum. Myndin hér til hliðar er tekin á markaði í Rovinj.
Rómverjar og Feneyingar
Rómverjar komu mikið við sögu á skaganum og hafa skilið eftir sig ýmsar minjar, s.s. hringleikahúsið í Pula sem er eina borgin á skaganum. Bæði Pula og bærinn Porec eru byggð skv. rómversku skipulagi. Feneyingar komu svo löngu síðar og ríktu á skaganum í nokkrar aldir. Eftir þá liggja margvíslegar byggingar, s.s. ýmis virki sem reist voru til að verjast bæði Tyrkjum og sjóræningjum.
Í sveitinni...
Það eru ýmsir skemmtilegir siður í Istriu í kringum maísuppskeruna. Þegar maísinn er orðinn þroskaður, er honum öllum safnað saman á einn stað á hverju heimili og um haustið sameinast svo fjölskyldan (e.t.v. ásamt vinum og ættingjum) og skemmtir sér við að tína blöðin af maísnum og hreinsa hann. Konurnar hafa þá bakað fyrir tilefnið og bakkelsið er óspart nýtt ásamt tilheyrandi vínföngum. Þegar öllu er lokið er dansað fram á nótt við harmonikkuundirleik. Myndin hér að ofan er tekin á afar skemmtilegum bæ vínbónda nokkurs í Pazin á miðjum Istriaskaganum, Konoba "Bani" - Zarecje, Bani 73, Pazin. Sími: +385 (0)52 621762.
Polenta (n.k. maísgrautur) var vel þekkt fæði og var áður fyrr matreitt mikið af henni í einu svo það mætti endast fjölskyldunni í nokkra daga.
Villiaspas vex á skaganum frá enda febrúar til maí - og fara allir sem vettlingi geta valdið að leita að honum, tína og safna í búnt og selja síðan við vegarkantinn.
Ætiþistlar eru tíndir á sama hátt þótt þeir séu ekki villtir, en þeirra tími er seinnihluti maímánaðar og fram í júní. Þetta er svo gjarnan selt við vegarkantinn líka.
Hinn dularfulli jarðkeppur (truffle) vex á skaganum, bæði svartur og hvítur og þykir algjört lostæti í matargerð. Hann vex eingöngu neðanjarðar, engin planta ofanjarðar og því þarf sérþjálfaða hunda til að finna hann. Jarðkeppurinn er algengastur í nágrenni bæjarins Buzet.
Nektarnýlendur
Það vekur athygli þegar siglt er meðfram ströndum Istriu að víða eru sérstakar "nektarnýlendur" og oft skondin sjón fyrir "óvana" Íslendinga að sjá heilu þyrpingarnar af kviknöktum sóldýrkendum...
Ferðamálaráð
http://www.istra.com/
