Ferðalangur

Farðu tvo hringi...!

Þú ert að aka erlendis á hringtorgi sem mjög eru "í tísku" núna og vegaskiltin eru svo mörg og óljós að þú ert í vandræðum. Gott ráð er að taka einfaldlega annan hring og jafnvel þann þriðja... meðan þú ert að átta þig og lesa á skiltin!

Lucca

Lucca (íbúar tæplega 100.000) - ein af aðalborgum Toskana héraðs en trúlega vanmetin af ferðamönnum og vill stundum gleymast við hliðina á nágrannaborginni Pisa. Lucca er þó engu ómerkari og fáar borgir varðveita jafn mikið af rómönskum minjum.

Gisting
Hótel frá Venere, Hótel frá Hotelclub.com, HostelWorld.

Flug
Ryanair flýgur til Pisa frá London Stansted en frá Pisa er hægt að taka t.d. lest eða leigubíl (hálftíma lestarferð) til Lucca.

InterContinental Hotels Group og Hostelworld

Tveir nýir hótelvefir hafa bæst við þá sem fyrir voru á Ferðalangi:

• InterContinental Hotels Group með yfir 3500 hótel í 100 löndum, þar af hinar þekktu hótelkeðjur Holiday Inn, Crowne Plaza, Hotel Indigo og fleiri. Þarna eru á ferðinni hótel sem henta mjög vel athafnafólki í viðskiptaerindum sem og fólki í fríi.
• Hostelworld þjónar aftur á móti öðruvísi hópi viðskiptavina, s.s. námsmönnum og þeim sem leita að gistingu í ódýrari kantinum og kunna vel því andrúmslofti sem oft má finna á "hostelum".

Ferðalangur leitast við að geta boðið gistingu fyrir mjög breiðan hóp og þar með mismunandi gerðir gistingar og ættu nú flestir að geta fundið gistingu við hæfi hér á síðum Ferðalangs.

Hum - minnsti bær í heimi?

Hunang og jarðkeppamauk í fallegum krukkum, leirvarningur og lavender, glagíólítiskt letur...og einungis 23 íbúar! Ekki má heldur gleyma hnausþykku samlokunni með heimatilbúna brauðinu, ostinum og skinkunni sem fékkst á eina veitingastaðnum í Hum - en á hana dugði ekkert minna en kjálkar afkomenda norrænna víkinga...

Allt þetta og meira til kemur í hugann þegar rifjuð er upp heimsókn til Hum sem líklega verður að telja einn af minnstu bæjum í heimi.

München - Oktoberfest

Stærsta árlega "partý" eða hátíð í Evrópu er án efa Oktoberfest í München sem árlega dregur að sér um 6 milljón gesti og hefur verið haldin í 172 ár. Hátíðin í ár hefst þann 17. september og endar 3. október.

Árið 1810 kvæntist Ludwig prins af Bæjaralandi Therese nokkurri prinsessu og borgarbúum í München var boðið til mikillar hátíðar. Henni var valinn staður á svæði utan borgarhliðsins sem síðan hefur verið nefnt í höfuðið á prinsessunni, Theresienwiese. Borgarbúar kalla svæðið hins vegar einfaldlega "Wies'n". Hátíðahöldin tókust svo vel að ákveðið var að gera þetta að árvissum viðburði...

Myndir frá Króatíu

Ferðalangur heimsótti Króatíu fyrr í sumar og nú er hægt að skoða nokkrar myndir á Ferðalangi frá áfangastöðum eins og eyjunni Krk og samnefndum bæ sem er höfuðstaður eyjarinnar, bænum Opatija, Plitvice þjóðgarðinum o.fl.

Góða skemmtun!

Bill Bryson ferðabókahöfundur - engum líkur

Bill Bryson er eflaust mörgum að góðu kunnur fyrir ferðabækur sínar. Ef til vill leynast þó ennþá einhvers staðar þeir sem ekki hafa heyrt hann nefndan né lesið eftir hann bækur og er þá einfaldlega ástæða til að hvetja til þess!

Bækur hans eru engar venjulegar ferðahandbækur. Bryson er afar góður stílisti/rithöfundur og býður lesandanum upp á leiftrandi innsæi og sjónarhorn sem fáum öðrum er gefið.

Frábært B&B rétt hjá Pavia á Ítalíu

La Cà Vecchia... Staðurinn yndislegur, maturinn ógleymanlegur og gestgjafarnir afar viðkunnalegir. Og jú - gott verð á gistingu m/morgunmat (25 evrur pr. mann) og margrétta kvöldmatur með drykkjarföngum ef fólk vill, á svipuðu verði fyrir manninn. Einhver maðkur í mysunni? Nei, nema hvað það er nauðsynlegt að vera á bíl og hafa góðar leiðbeiningar til að finna staðinn sem liggur í smáþorpinu Rea uppi í sveit, um 18 km frá borginni Pavia.

Fyrir hverja? Alla þá sem hafa gaman af að kynnast fólki í því landi sem ferðast er um, dvelja uppi í sveit og vilja upplifa ítalska gestrisni eins og hún gerist best!

Ferðalangur á hraðbrautum Frakklands

Ferðalangur ók töluvert eftir hraðbrautum Frakklands fyrr í mánuðinum. - Það er dýrt að aka eftir þeim og vert að minna á slóð sem birtist á Ferðalangi í mars s.l., http://www.autoroutes.fr, sem reiknar út vegatollana milli tiltekinna staða. Sem dæmi má nefna að þegar ekið er frá Nice í Suður-Frakklandi til Metz rétt við landamæri Luxemburg kostar það um 60 evrur!

Antibes í falsettu

Stundvíslega kl. 6 á hverjum morgni, hleypti madame Ginette hundinum út og átti við hann heillangar samræður sem fóru að mestu leyti fram í syngjandi falsettu, en það ku vera einkennandi fyrir hreim fólks á þessum slóðum. Ferðalangur vaknaði yfirleitt af værum blundi í sumaríbúðinni sinni í Antibes, við þessar innihaldsríku samræður, en hvað gerir það til þegar sólin skín á dýrðlegum morgni?

Myndir frá Antibes

Flugnabit og "tea tree olía"

Ferðalangur komst að raun um að tea tree olía dugði vel í sumar í baráttunni við þrota í húð eftir flugnabit og tilheyrandi kláða. Ef náðist að bera olíuna á fljótlega eftir bit og endurtaka það síðan nokkrum sinnum á dag, varð mun minna úr bitinu en ella. Olían fæst a.m.k. í The Body Shop og mörgum apótekum.

Akstur á meginlandi Evrópu

"Be careful out there – the idiot’s guide to Euro travel" heitir afar góð grein eftir Joseph Dunn af vefsíðu TimesOnline.co.uk.

Fjallað er um mismunandi merkingar og umferðarmenningu á meginlandi Evrópu, hámarkshraða, leyfilegt magn alkóhóls í blóði ökumanna og fleiri gagnlegar upplýsingar. Mjög góð lesning fyrir hvaða ökumann sem er.

Löndin sem minnst er á eru: Frakkland, Þýskaland, Belgía, Holland, Ítalía, Spánn, Portúgal, Ítalía, Grikkland, Svíþjóð og lönd Austur-Evrópu.

Af bílaleigubílum...

Í Morgunblaðinu, 17. ágúst 2005, mátti lesa fróðlega punkta hjá Víkverja sem "er nýkominn úr sumarfríi sínu, ferskur og fílelfdur".

Víkverji minntist meðal annars á nokkur atriði varðandi bílaleigubíla sem Ferðalangur vill endilega taka undir og bæta við enda sjálfur nýkominn heim úr hálfsmánaðarferð á bílaleigubíl um Evrópu.

Uppáhalds hjólaleiðir þekktra kappa

Nokkrir vel þekktir, erlendir hjólreiðamenn deila með lesendum uppáhaldsleiðum sínum í greininni Blood, sweat and gears: Our favorite two-wheeled trips og má þar sjá bæði styttri og lengri leiðir innan Evrópu og raunar eina í Kaliforníu.

• Skosku hálöndin
• Wirral Peninsula (Bretland)
• Pýrenneafjöllin (Frakkland)
• Lucca (Ítalía)
• Avon (Bretland)
• Alpujarras (Spánn)
• Gardavatnið (Ítalía)
• Baia (Kalifornía, USA)

Nánari upplýsingar um lengd og fyrirkomulag ásamt gagnlegum vefslóðum í greininni hér að ofan.

Hvernig er hægt að halda matarútgjöldum í lágmarki?

Flestir geta líkast til tekið undir það að matarkostnaður í ferðalögum getur orðið umtalsverður ef ekki er vel að gáð... það er svo auðvelt að setjast einfaldlega inn á næsta veitingastað ... En - sumir þurfa að passa budduna og með smá útsjónarsemi er það líka hægt.

Five Chances to Save on Food when Travelling heitir grein á About.com. Greinin er fyrst og fremst skrifuð fyrir bandaríska ferðalanga en nokkrir ágætir punktar í henni eiga þó við alla.

Ósnortnir eyjaklasar Ítalíu - vel varðveitt leyndarmál

Þar er lítil sem engin enska töluð... fábrotið fæði... engar verslunarmiðstöðvar né "merkjabúðir"... hótel sem svo sannarlega henta ekki þeim kröfuhörðustu og engin CNN sjónvarpsstöð á herbergjunum! Eitthvað fyrir þig?

Ef svarið er já, mælir Ferðalangur svo sannarlega með greininni Italy's Undiscovered Islands af vefsíðu travelandleisure.com.

Guinness Storehouse í Dublin

Einn af vinsælustu stöðunum til að sækja heim í Dublin er hið sjö hæða Guinness[R] Storehouse þar sem sjá má allt um hina 250 ára sögu bjórgerðar Arthur Guinness og fjölskyldu. Þar er einnig að finna hæsta bar í Dublin...

Byggingin er opin sjö daga vikunnar frá 9:30 - 17:00 (og til kl. 20:00 í júlí og ágúst). Aðgangseyrinn er 14 evrur og í því er innifalinn bjór á "Gravity" barnum.

Vefsíða
www.guinness-storehouse.com/

Alicante, ekki bara flugvöllur!

Alicante á Spáni er ekki bara flugvöllur fyrir ferðalanga til Benidorm og Costa Blanca - heldur einkar viðkunnaleg 300.000 manna borg sem íbúar Madrid hafa heimsótt af kappi s.l. 150 ár eftir að járnbraut var lögð þangað 1858 frá Madrid.

Madrid on Sea heitir grein úr The Guardian sem lýsir helgarheimsókn til þessarar notalegu borgar þar sem lítið ber á öðrum gestum en Spánverjum sjálfum.

Gisting í Alicante
HostelWorld, Venere, HotelClub - Sjá einnig hótelvef Ferðalangs - Spán.

"And then Somme"

Í norðurhluta Frakklands rennur áin Somme út í Ermarsund - sundið milli Frakklands og Englands. Héraðið í kring er vel geymt og að mestu óuppgötvað sem ferðamannastaður. Það eru þó líkast til margir sem vita að svæðið var vettvangur hrikalegustu og mestu bardaga heimstyrjaldarinnar fyrri.

Ókeypis skemmtun í London

London er ein af dýrustu borgum heims að sækja heim en þó má eiga þar stórskemmtilegar stundir án þess að þurfa að kosta miklu til og stundum engu. Sérstaklega yfir sumartímann. Um það má lesa í What to See on a Sightseeing Spree That's Free (or Nearly so) in London af vefsíðu Frommers.com.

Lesið um listir og söfn, tónlist og dans, skrúðgarða, markaði og fleira í þessari ágætu grein sem er stútfull af gagnlegum upplýsingum og vefslóðum.

Luzern - veisla fyrir augu og eyru

Luzern er höfuðborg samnefndrar kantónu í miðju Sviss (íbúar um 325.000) og stendur við Vierwaldstätter See (Lake Lucerne). Um borgina rennur áin Reuss og brýrnar yfir ána eru mikil prýði ekki síst yfirbyggða Kapellubrúin með gamla steinturninum við annan endann.

Borgin og umhverfi hennar er þekkt fyrir fegurð - vel varðveittan og gamlan miðbæ, þröngar hellulagðar götur og fallegar kirkjur. En þar með er ekki allt upp talið, því í Luzern er einnig heilmikið menningarlíf.

Taormina, Palermo o.fl. staðir á Sikiley

Ferðahandbækur eru ómissandi og nauðsynlegt að geta flett upp ýmsum staðreyndum og leiðarlýsingum í þeim. Slíkar bækur ná þó oft á tíðum ekki að lýsa andrúmslofti staða sem auðvitað er að mestu einstaklingsbundin upplifun. Þess vegna jafnast fátt á við góða grein um áhugaverða staði sem lýsir upplifun höfundar eins og gerist í greininni The other side of Paradiso af vefsíðu The Guardian. 

Í greininni lýsir Simon Mills dvöl sinni á Sikiley og fjallar um Taormina þar sem Halldór Laxness skrifaði Vefarann mikla frá Kasmír, Palermo, Porticello (eitt mikilvægasta fiskiþorp eyjarinnar) og Cefalú þar sem kvikmyndin fræga Cinema Paradiso var gerð.

Gisting á Sikiley
HostelWorld og Venere

Gömul og virðuleg hótel í Frakklandi

Þeim fer fækkandi frönskum hótelum "af gamla skólanum" sem rekin hafa verið af sömu fjölskyldunni í marga ættliði. Þau sem eftir standa, kunna að vera gamaldags en geta þó áreiðanlega keppt við mörg hin nýrri hótel hvað varða "sjarma" og heillandi andrúmsloft.

Fiona Duncan gerir úttekt á slíkum hótelum víða um Frakkland og í París, í grein sinni Plus ça change á vefsíðu Travel Telegraph. Sum hótelin hafa lítið breyst í tímans rás, önnur hafa breytt um eigendur en halda þó sínum upphaflega gamaldags karakter og örfá eru nýleg en byggð í anda þeirra gömlu.

Orkneyjar

Það eru yfir 70 eyjar í eyjaklasanum sem nefnist Orkneyjar en þar af eru aðeins 17 þeirra byggðar. Ferðamannaiðnaður á Orkneyjum er vel skipulagður og eyjarnar hafa upp á mikið að bjóða. Ekki einungis er saga þeirra stórmerkileg, heldur einnig afar forvitnilegt að skoða eyjarnar eins og þær líta út í dag.

Veitingastaðir í London (og víðar) og sértilboð

Á vefsíðunni Top Table - www.toptable.co.uk, er hægt að lesa um, skoða myndir af og velja úr miklum fjölda veitingastaða í London og síðan að panta borð yfir netið ef svo ber undir. Ástæða er til að vekja sérstaka athygli á Special Offers þar sem hægt er að sjá hvaða veitingastaðir bjóða afslætti (oft verulega!) og ýmis tilboð.

Hvar í borginni á veitingastaðurinn að vera? Hvers konar matargerð?

Vefsíðan nær yfir veitingastaði í  London og í 30 öðrum borgum í Bretlandi en gefur einnig möguleika á að leita uppi veitingastaði í París. Oft fylgja umsagnir gesta.