Ferðalangur

Listahátíðir í Búdapest

Í Búdapest er haldin árleg hausthátíð, Budapest Autumn Festival (BAF). Hátíðin hefur verið haldin árlega síðan 1992 og er afar fjölbreytt. Allar listgreinar fá þar inni og þess má geta að "lifandi list" og nútímalistsköpun er n.k. einkennismerki hátíðarinnar.

Vefsíða haustlistahátíðarinnar
http://bof.hu/

Í leiðinni má geta þess að á vorin er einnig haldin mikil hátíð, Budapest Spring Festival. Næsta vorhátíð verður haldin 17. mars - 2. apríl 2006.

Nánari upplýsingar um hátíðir í Búdapest
www.festivalcity.hu.

"Paris revisited"

Þeir sem hafa gaman af að lesa sér til um áfangastaði, geta sannarlega notið þess að glugga í bókina Paris Revisited: The Guide for the Return Traveler eftir bandarískan verðlaunahöfund, Gary Lee Kraut.

Bókin er um 450 síður, stútfull af nýtilegum upplýsingum um þekkta staði í París, en ekki síður staði utan alfaraleiða, hótel, verslanir, flóamarkaði, söfn og margt, margt fleira.

Bókin fær afar góða dóma lesenda á Amazon.com.

Cagliari - höfuðstaður Sardiníu

Það er ekki mikið mál að bregða sér til Cagliari yfir helgi (íb. ca. 165.000) á ítölsku eyjunni Sardiníu. Lágfargjaldaflugfélagið EasyJet flýgur þangað daglega  frá London Luton.

Eins og svo oft í ítölskum borgum er það gamli miðbærinn sem heillar e.t.v. mest, miðaldakjarni með fögrum kirkjum og byggingum, rómversku hringleikahúsi og góðum veitingastöðum. Ekki má heldur gleyma því að ströndin er í seilingarfjarlægð.

Gisting
Hótel frá Venere

Frábær bændagisting (B&B) - 100 km suður af Lyon

Au Rucher de Jabelin heitir sérlega viðkunnalegt bændabýli úti í sveit um 100 km suður af Lyon, ekki langt frá borginni Valence. Ekki er þó langt í "menninguna" því bærinn Romans liggur einungis í 1-2 km fjarlægð.

Þarna búa hjónin Thérèse og Jacques Blanchy og sinna býflugnabúskap og bændagistingu. Húsið er um 200 ára gamalt, afar fallega uppgert og stendur á milli maís- og sólblómaakra með útsýni til fjalla í fjarska.

Frábær bændagisting - Au Rucher de Jabelin (B&B) 100 km suður af Lyon

Au Rucher de Jabelin heitir sérlega viðkunnalegt bændabýli úti í sveit en þó skammt frá "menningunni" (2 km í næsta veitingastað). Býlið liggur 100 km suður af Lyon, ekki langt frá Valence í nágrenni lítils bæjar sem heitir Romans.

Þarna búa hjónin Thérèse og Jacques Blanchy og sinna býflugnabúskap og bændagistingu. Húsið er um 200 ára gamalt, afar fallega uppgert og stendur á milli maís- og sólblómaakra með útsýni til fjalla í fjarska.

Telc, Kutna Hora og Mikulov

Það er fleira að skoða í Tékklandi en höfuðborgin Prag ein og sér. Víða um Tékkland liggja afskaplega friðsælir og fallegir bæir. Telc, Kutna Hora og Mikulov eru þrír slíkir,  þar af eru tveir þeirra á heimsminjaskrá UNESCO.

Telc, sem liggur um 160 km suðaustur af Prag, er á heimsminjaskrá vegna húsanna í gamla bænum sem upphaflega voru úr tré, en eftir mikinn eldsvoða á 14. öld voru þau endurbyggð úr steini.

Enn um íbúðaskipti

Ferðalangur hefur áður birt nokkrar slóðir sem nýtast vel þeim sem hyggja á íbúðaskipti. Hér er ein í viðbót:

International Home Exchange Network
www.ihen.com

Þessi samtök voru stofnuð árið 1995 og hægt er að skrá sig þar bæði til að skipta á íbúð (home exchange) og til að leigja út húsnæði í skamman tíma (vacation rentals). IHEN tekur 39,95 dollara fyrir skráninguna sem gildir í eitt ár.

Vinir um víða veröld

Margir ferðalangar hafa gaman af að kynnast heimamönnum í viðkomandi landi. Ein leið til þess er að ganga í klúbb eða samtök þar sem meðlimir veita ókeypis gistingu ef og þegar það hentar.

Þess ber að geta að svona fyrirkomulag gengur því aðeins að sem flestir séu tilbúnir til að VEITA gistingu - ekki einungis að þiggja hana... :-).

• Global Freeloaders
  www.globalfreeloaders.com
• The Hospitality Club
  www.hospitalityclub.org
• Couch Surfing
  www.couchsurfing.com

Lesið endilega FAQ kaflann á síðunum, (frequently asked questions) til að fá nánari útlistun á því sem klúbbmeðlimir gangast undir.

"Le vie ferrate" og Dólómítarnir

Ítölsku Dólómítarnir gefa göngugörpum kost á ægifögrum göngu- og klifurleiðum eftir slóðum sem gjarnan eru nefndar "le vie ferrate" eða "járnvegirnir" (ferro=járn), en ýmis hjálpargögn og járntól auðvelda göngumönnum klifrið á slíkum slóðum.

Í greininni Iron and mighty af vefsíðu The Guardian gefur Alf Alderson greinargóða mynd af möguleikum sem bjóðast á svæðinu Alta Badia í Dólómítunum. Ef ekki væri þessum "vie ferrate" fyrir að fara, gætu ekki nema þjálfuðustu göngu- og klifurgarpar nýtt sér þessar dramatísku leiðir en eins og staðan er í dag eru leiðirnar gjarnan merktar frá A - G, þar sem "A" leiðir eru auðveldastar og "G" þyngstar.

Fimmtíu bestu veitingastaðir í heimi

Tímaritið Restaurant Magazine velur árlega 50 bestu veitingastaði í heimi. Árið 2005 eru um fjórðungur þeirra staða, sem rötuðu inn á listann, staðsettir í London. Á vefsíðu Fodors.com er hægt að kynna sér listann og lesa umsagnir um veitingastaðina.

Í London eru m.a. nefndir eftirfarandi staðir:

• Gordon Ramsay
• Tom Aikens
• The Gallery at Sketch
• Angela Hartnett at the Connaught

Forvitnileg lesning fyrir alla þá sem gaman hafa af góðum veitingastöðum.

Ljubljana

Vinsældir borgarinnar Ljubliana í Slóveníu (íbúar ca. 270.000) hafa aukist mikið á nokkuð skömmum tíma og ef lesendur rýna aftur í tímann, þá er ekki víst að nafnið Ljubljana hafi sagt þeim mikið fyrir aðeins nokkrum árum...

Borgin hefur stundum verið kölluð "Litla Prag" - án mannfjöldans sem í Prag er oft að finna, hæfilega lítil, róleg og einkennist af fallegum, ljósleitum barokkbyggingum. Ef skyggnst er út fyrir miðbæinn má jafnvel sjá fólk að dunda í grænmetisgörðunum sínum í aðeins 300 m fjarlægð frá miðbænum. Og merkilegt nokk... þá þýðir trg á slóvensku torg á íslensku...

Gisting í Ljubljana
Ódýrir gistimöguleikar hjá HostelWorld og Venere. Sjá einnig gistingu í Slóveníu á hótelvef Ferðalangs - Slóveníu.

Edinborg að hætti Ian Rankin

Hvað gerist þegar Edinborgarhátíðirnar í ágúst taka enda og gestirnir yfirgefa svæðið? Er þá eitthvað eftir? Allt - segir sakamálarithöfundurinn þekkti, Ian Rankin.

Edinborg vaknar til "öðruvísi lífs" í september þegar mestur hluti ferðamanna er horfinn á braut og háskólanemar ekki enn búnir að gera innrás - þá gefst góður tími fyrir íbúana sjálfa og einstaka ferðamenn að rölta um tómar göturnar og njóta þess að finna pláss á kaffihúsum og veitingastöðum. Meira um Edinborg og faldar hliðar hennar að hætti Ian Rankins í greininni Edinburgh Confidential af vefsíðu Timesonline.

Hótel og fjölbreytt gisting í Edinborg

Uppfært febrúar 2011

Á slóðum stærstu gauksklukku veraldar

Skemmtileg grein, Totally Cuckoo, af vefsíðu TimesOnline.co.uk segir frá ferð á slóðir gauksklukkna í Svartaskógi. Hvað er gauksklukka, hvaðan er hún upphaflega og hvar er að finna stærstu klukkuna?

Leiðin liggur um Badenweiler, Badische Weinstrasse, Staufen, Breisach, Keiserstuhl, Ihringen, Bickensohl og loks til Freiburg. Síðan áfram til Glottertal, St Märgen, Titisee, Triberg, Schonachbach og Schonach. Skemmtileg frásögn hjá Anthony Peregrine um 4ra daga ferð á þessum fallegu slóðum.

Gisting í Þýskalandi
Sjá hótelvef Ferðalangs - hotelvefurinn.net - Þýskaland.

Salzburg í Mozartbúningi

Íbúar í Salzburg búa sig nú undir að halda veglega upp á 250 fæðingarafmæli Mozarts árið 2006 og munu hátíðahöldin standa yfir meira og minna allt árið.

Mozart fæddist í Salzburg og bjó þar mestan hluta ævi sinnar en það borgar sig að tala sem minnst um að hann hafi dvalið síðustu æviár sín í Vín og látist þar... það má alveg kyrrt liggja. - Það er í lagi að nefna annan "son" borgarinnar, Johann Michael Haydn, en reynið ekki að halda því á lofti að kvikmyndin Sound of Music hafi verið tekin í og við Salzburg - íbúar Salzburg vilja langtum frekar tengja borgina Töfraflautunni en Edelweiss!

Jersey

Eyjan Jersey á Ermarsundi hefur alltaf vakið nokkra forvitni hjá Ferðalangi, kannski af þeirri einföldu ástæðu að fyrir allmörgum árum var sýndur ágætur myndaflokkur í sjónvarpinu sem tekinn var á eyjunni og gerðist í seinni heimstyrjöldinni....

Eyjan liggur um 100 mílur suður af Englandi og aðeins 14 mílur vestur af Frakklandsströnd. Íbúar þar eru ekki nema um 87.000 eða rétt tæplega íbúafjöldi Reykjavíkur.

Jólamarkaðir í Þýskalandi

Jólamarkaðir í Þýskalandi, Weihnachtsmärkte eða Christkindlmärkte hafa verið hluti aðventunnar þar í landi í meira en 500 ár. Sagt er til að mynda að jólamarkaðurinn í Dresden hafi verið haldinn frá 1434 og margir aðrir séu ekki mikið yngri.

Bled - töfrum líkast

Töfrum vafið Bled (íbúar ca. 5200) -  þar sem þjóðsögur og ævintýri hafa þrifist meðal fólks í gegnum aldirnar, s.s. sagan um hina slavnesku gyðju Ziva, prestynjuna Bogomila og manninn sem elskaði hana.

Það er ekki að ástæðulausu sem ferðamenn flykkjast í stríðum straumum til Bled. Staðurinn er eins og klipptur út úr hugarheimi ævintýranna þar sem Bled vatnið skartar einni lítilli eyju með kirkju úti á miðju vatni, svo gott sem rammað inn af Julian ölpunum og Karavanke. Mitt í fegurðinni stendur Bled kastali utan í hömrunum við vatnið. Töfrum líkast.

Gisting í Bled
Hótel/Pension frá Venere, ódýrir gistimöguleikar frá Hostelworld, gisting í Slóveníu á hótelvef Ferðalangs.

Hin fræga Cote d'Azur...

Cote d'Azur, eða Franska rívíeran hefur löngum verið vinsæll viðkomustaður ferðamanna. Í greininni 3 days in beautiful Cote d’Azur af vefsíðu Honolulu Star-Bulletin má lesa ágætis samantekt um þriggja daga heimsókn til helstu staða við þessa frægu strönd: Nice, Cannes, Antibes, Villefranche og Mónakó. Greinin er ágætis blanda af fróðleik og praktískum upplýsingum og loks fylgja henni nokkrar nytsamlegar vefslóðir fyrir áhugasama.

Gisting
Gott verð á gistingu frá Venere, HostelWorld, HotelClub.

Ódýrara að fara á skíði nú en fyrir 10 árum

Skíðaáhugafólk fer trúlega senn að huga að framboði skíðaferða fyrir veturinn.

Nýlega gerð var könnun  á kostnaði við skíðaferðir á vegum Chris Gill og Dave Watts, sem eru ritstjórar bókarinnar Where to Ski and Snowboard 2006. Könnun þeirra leiddi í ljós að það er mun ódýrara að fara í skíðaferð nú en fyrir 10 árum síðan. Mestu munar á verði skíðaferða í Sviss, en þar er 20% ódýrara að fara á skíði nú en 1995.

Á Toskanaslóðum

Hér kemur eitthvað fyrir sælkerana... - On the Tuscan Trail af vefsíðu Travel and Leisure segir frá nokkrum af bestu "handverksmönnum" Toskanahéraðs hvað varðar mat og drykk. Armando Manni, sem framleiðir dýrustu olífuolíu í heimi leiðir greinahöfund um Toskana og kynnir hann m.a.  fyrir víngerðarmönnum, ostagerðarmönnum og pylsugerðarmönnum sem enn framleiða sínar afurðir upp á gamla mátann...

Sigling á Thames ánni

Það er eitthvað sérstakt við það að sigla í gegnum stórborgir eins og t.d.  Búdapest og Prag. Það sama á við um London og hér fyrir neðan koma nokkrar nýtilegar slóðir fyrir þá sem hyggja á siglingu á ánni Thames. Athugið að hægt er að kaupa miða í siglingar á flestum bryggjum og í nokkrum neðanjarðarlestarstöðum.  Athugið með afslætti t.d. fyrir námsmenn, börn og eldri borgara.

Galicia - ósnortnar strendur við Atlantshafið

Það tekur ekki nema tvær stundir að fljúga með Ryanair frá Stansted til borgarinnar Santiago de Compostela á Spáni. Gavin McOwan mælir með því að breyta til, láta strendur Miðjarðarhafsins eiga sig og aka frá Santiago de Compostela til að skoða ósnortnar strendur Atlantshafsins í héraðinu Galiciu, nálægt portúgölsku landamærunum. Í greininni Spain unplugged kemur hann m.a. við í bæjunum Pontevedra,Vigo og Baiona. Eitthvað fyrir þá sem kjósa fáfarnari staði...

Heidelberg

Það hljóta beinlínis að vera forréttindi að vera einn af hópi 32.000 námsmanna í borginni fögru, Heidelberg (íbúar ca. 140.000). Að minnsta kosti horfði Ferðalangur með öfund á þá námsmenn sem sjá mátti skokka og hjóla meðfram ánni Neckar eða í vinahópi á "pöbbum" miðbæjarins með hinn stórfenglega Heidelbergkastala í baksýn.

Þegar fyrst er ekið inn í borgina er auðvelt að álykta sem svo að þetta sé hálfgerð stórborg. Sú tilfinning er fljót að hverfa þegar bílnum er lagt og haldið af stað fótgangandi inn í miðbæinn, "Altstadt".

Myndir frá Heidelberg

Fjölbreytt gisting á góðu verði í Heidelberg

Hvaða heimsminjar eru í mestri hættu?

Til eru samtök, "World Monuments Fund", sem halda úti  nokkurs konar "veraldarvakt" - World Monuments Watch - og felst starf samtakanna í að stuðla að varðveislu þeirra sögulegu fornminja og listmuna í heiminum sem taldar eru í mestri hættu. Á vefsíðu þeirra er hægt að sjá lista og upplýsingar um þær 100 fornminjar sem tróna efst á "hættulistanum".

http://wmf.org/

Lugana, Prosecco, Picolit...

Það er kominn tími til að gefa fleiri vínhéruðum en Toskana tækifæri.... - Sífellt fleiri vínbændur á Norður-Ítalíu, sér í lagi í Lombardiu (Langbarðalandi), Veneto, Friuli og Alto Adige, hafa opnað hús sín fyrir gestum og bjóða nú gistingu með meiru.

Vines, wines and a bed in a castello segir frá nokkrum mjög góðum stöðum í norðurhlutanum, þar sem hægt er að sameina gistingu, kvöldverð, heimsókn á vínekru og vínsmökkun. Það jafnast fátt á við það að komast í snertingu við fólkið sjálft og andrúmsloftið á ítalskri vínekru og þetta er ágæt leið til þess og einnig til að fá tækifæri til að smakka síður þekktar víntegundir.