Ferðalangur

Heimagisting í Bourgogne-héraði

Ferðalangur fékk skemmtilega ábendingu um litla heimagistingu skammt frá bænum Sens sur Seille í suð-austurhluta Bourgogne-héraðs sem bresk hjón reka, þau Carolyn og John Scallan sem hér sjást á myndinni í garði sínum.

Á heimasíðu þeirra, http://www.bandb-burgundy.com/, eru upplýsingar m.a. á íslensku. Boðið er upp á "gistingu í fjórum rúmgóðum tveggja manna herbergjum. Morgunverður fylgir gistingunni. Herbergin eru öll með góðri baðaðstöðu, sturtu og klósetti. Allt er mjög heimilslegt. Gestir hafa aðgang að stofum húsins og notalegum garði. Ef menn vilja bjóða Scallan hjónin upp á ríkulegan fjórréttaðan kvöldverð. Þá njóta menn rétta héraðsins, osta og vína. " (Orðrétt af heimasíðu).

Kastalar í Wales

Sumir kunna að halda að það sé hægt að komast yfir Wales á einum degi, en fátt er fjær sanni.

Wales er land kastalanna þar sem meira en 400 rammgerð virki gleðja þá sem áhuga hafa á sögu og gömlum minjum.

Harlech kastali, Norður-Wales

Þessi kastali (sjá mynd) er hrein uppspretta þjóðsagna, ljóða og söngva enda orðinn meira en sjö alda gamall. Hann var upphaflega byggður af Edward I til ð bæla niður uppreisnagjarna Walesbúa. Kastalinn gnæfir yfir litla strandbæinn Harlech, í 12 mílur suður af Porthmadog. Kastalarústirnar sjást víða að og eru afskaplega dramatískar eins og raunar saga kastalans.

Dagsferðir frá London

Það er af nógu af taka þegar velja á dagsferð frá London. Má þar nefna Bath og Stonehenge, Windsor kastala, Cliveden,  Blenheim höll, Stratford-upon-Avon, Brighton og fleiri staði sem auðvelt er að heimsækja með lest.

Á vefsíðu Fodors.com er skemmtileg lesning um fjóra dagsferðarmöguleika til viðbótar, Day Trips from London, þ.e. Cambridge, Oxford, Salisbury og York.

Glasgow

Sagt er að Glasgow hafi nánast breyst á einni nóttu úr þéttbýliskjarna í stórborg. Og þó að nágranninn, Edinborg státi af miklum og vinsælum hátíðum, Edinborgarkastala og fleiru, þá standur Glasgow fyrir sínu.

Í Glasgow eru fleiri garðar á hverja fermílu en í nokkurri annarri borg í Evrópu, mun betri verslunarmöguleikar en í Edinborg og áhrifa arkitektsins Charles Rennie Mackintosh gætir víða. Glasgow er semsé "heit" :-).

Sjá nánar umfjöllun um Glasgow af vefsíðu Fodors.com The Best of Glasgow en þar má lesa um það markverðasta sem hægt er að skoða, góða veitingastaði o.fl.

Pompei - aftur til fortíðar

Það er ekkert grín að heimsækja Pompei og þær stórmerkilegu gömlu borgarrústir sem þar er að finna.

Strax um hálf níu leytið að morgni er aðalhliðið Porta Marina fullt af fólki.  Og fyrir innan má sjá um 163 ekrur af rústum sem hafa nánast ótrúlega sögulega þýðingu.

Daglegt líf
Fjöldi merkra bygginga í Pompei er ómetanlegur, sem og mósaikið og veggmyndir sem varðveist hafa. Arkitektúrinn þar og listir voru partur af blómlegum bæ þar sem um 20.000 manns bjuggu, stunduðu verslun og viðskipti, átu, drukku, tilbáðu sína guði og sóttu vændishús.

Gönguferðir í Berlín

Ferðalangur rakst á afar góð meðmæli með gönguferðum í Berlín sem hægt er að skoða á vefsíðunni Original Berlin Walks. Ekki er nauðsynlegt að panta fyrirfram heldur nóg að mæta á staðinn þar sem lagt er af stað og greiða þar. Það er þó  hægt að kaupa miða á vefsíðunni ef fólki sýnist svo.

Gönguferðirnar eru alls sex sem farnar eru reglulega og sumar oftar en einu sinni á dag. Einnig er hægt að sérpanta ferðir fyrir litla sem stóra hópa.

Bolzano - þýsk eða ítölsk borg?

Sagt er að í himnaríki séu Ítalir annað hvort kokkarnir, elskhugarnir eða skemmtikraftarnir og Þjóðverjar vélvirkjar eða skipuleggjendur. Í Helvíti snúast hlutverkin við - Þjóðverjar eru ýmist í hlutverki lögreglu eða skemmtikrafta og Ítalirnir skipuleggja...

Á þessa leið hefst grein af vefsíðu Washington Post sem nefnist Bolzano: German or Italian? Yes. Borgin Bolzano (ca. 100.000 íb.) er nefnilega einkennilega staðsett - miðja vegu milli ítölsku Dólómítanna og Tíról þeirra Austurríkismanna og þar er fyrsta tungumálið þýska. Í Bolzano getur ferðalangurinn snætt pasta en um leið reitt sig á að almenningsvagnar gangi á tilsettum tíma...

Meira um Bolzano í þessari ágætu grein hér að ofan.

Eyjan Madeira

Eyjan Madeira er stærsta eyjan í eyjaklasa sem kenndur er við Madeira og tilheyrir Portúgal. Hún er ekki nema 55 km löng og breiðust 22 km. Miðhluti eyjarinnar rís hátt, þar sem hæsti tindur er Ruivo de Santana, 1861 m.

Inn til landsins er eyjan að mestu óbyggð og ræktað land er ekki að sjá þegar komið er yfir 900 m hæð.

Madeira er kjörin til gönguferða af ýmsum þyngdargráðum og eftir hressandi gönguferð er hægt að láta fara vel um sig á heilsuhóteli ef fólk er í þeim gírnum.

Með börnin og unglingana til Þýskalands

Trúlega eru þeir margir sem ætla að fljúga til Þýskalands með fjölskylduna í sumar og taka bílaleigubíl. Hér koma nokkrar tillögur að viðkomustöðum sem ættu að geta gert ferðina skemmtilega fyrir yngri kynslóðina.

Würzburg
Ef flogið er til Frankfurt am Main er upplagt að aka til Würzburg sem jafnframt er n.k. upphafspunktur rómantísku leiðarinnar svokölluðu. Í Würzburg er gaman að skoða Residenz, risastóra 18. aldar höll þar sem biskupaprinsar höfðu aðsetur.

Einn stærsti dýragarður í Evrópu, Wildpark, liggur skammt Würzburg í Bad Mergentheim (tæplega klst. akstur). Mörg dýranna búa í náttúrulegu umhverfi, ekki í búri.

Prag - það sem ekki allir vita

Ferðalangur hefur áður fjallað um Prag, en hér koma ómetanlegar viðbótarupplýsingar frá Íslendingi sem býr í Tékklandi, Björgvini Brynjólfssyni, sem var svo vinsamlegur að deila þeim með lesendum Ferðalangs.

Bjórhimnaríki

Pivovarsky Dum er í göngufjarlægð frá Vaclavske Namesti.  Þetta er bjórhimnaríki og frægasta brugghús/bar í Prag.  Þarna er m.a. hægt að fá kaffibjór, bananabjór og kirsuberjabjór (!).

Heimilisfang:
Lípová 15 Prag 2

Sömu aðilar eru nýlega búnir að opna útibú í Karlín-hverfi, þar sem svipað þema er uppi á teningnum. 

Grænmetisveitingastaður í Róm - Arancia Blu

Eigandi veitingastaðarins Arancia Blu í Róm hefur þá "köllun" að sanna að grænmetisfæði sé ekki neinn annars flokks matur. Það tekst honum svo sannarlega, með bragðmiklum og fjölbreyttum réttum, enda á hann sinn áhangendahóp sem samanstendur bæði af grænmetis- og kjötætum. Hjá honum er ekki hægt að borga með kreditkorti og ekki er opið í hádeginu.

Heimilisfang
Via dei Latini 55/65 (San Lorenzo).

Grænmetisveitingastaður í London

Einn af elstu grænmetisstöðum í London er Manna Vegetarian Restaurant. Þar er ótrúlegt úrval af freistandi réttum, t.d. Yam Yam bollur, risotto kökur, bambuslauf með tofu fyllingu og núðlum og svo mætti lengi telja. Staðurinn hefur unnið til nokkurra verðlauna.

Heimilisfang
4 Erskine Road, Primrose Hill.

Grænmetisveitingastaður í París

Ekki er hægt að segja að París sé Mecca þeirra sem vilja eingöngu grænmetisrétti. Þó er nokkur fjöldi góðra grænmetisstaða þar, m.a. La Victoire Suprême du Coeur. Þar er hægt að fá grænmetis kebabs, salöt, kartöflurétti, grænmetiskjúkling, grænmetislasagne og alls kyns svepparétti.

Heimilisfang
41 rue des Bourdonnais.

Friedrichsbad - Baden-Baden

Ferðalangur ætlaði eitt sinn að heimsækja Baden Baden á leið sinni í bílaleigubíl "niður" Þýskaland en það fór ekki betur en svo að bílskömmin rataði ekki inn á réttu hraðbrautina og Ferðalangur missti af Baden Baden. Þar er hins vegar eftir ýmsu að sækjast, m.a. mikilli "baðparadís", Friedrichsbad, sem er baðstaður frá 19. öld með gufuböðum og heitum pottum sem taka á í tiltekinni röð...

Það er sér inngangur fyrir hvort kyn en þau hittast "í miðjunni" eftir að hafa dýft sér í mismunandi heita og kalda potta. Ef ferðalangar vilja síður rölta um naktir með gagnstæðu kyni þá er best að mæta á mánudögum eða fimmtudögum. Aðgangur er ekki heimill fyrir yngri en 14 ára.

Nánari upplýsingar: http://www.carasana.de/roemisch.html