Ferðalangur

Sardinía, norður-, suður- og vesturhluti eyjarinnar

Það eru ekki bara milljónamæringar sem geta notið dásemda ítölsku eyjarinnar Sardiníu eins og Ferðalangur komst sjálfur að raun um fyrir nokkru síðan. Á vefsíðu telegraph.co.uk er ágætis grein um Sardiníu: Enjoy a rich legacy at budget prices þar sem heimsóttir eru margir staðir á norðurhluta eyjarinnar en einnig á vestur og suðurhluta hennar.

Á Sardiníu eru margar af fegurstu ströndum Miðjarðarhafsins og Costa Smeralda ásamt bænum Porto Cervo er með þeim frægustu á Sardiníu. Þar með er þó ekki allt upp talið - því hvar vetna eru fallegir staðir og engin ástæða til að halda sig eingöngu á þekktum stöðum.

Mynd: Austurhluti Sardiníu, S. Lucia

Hjólað í París

Í júlí s.l. (2007) hófu Parísarbúar að nota nýja þjónustu sem hlotið hefur nafnið Velib og felst í því að íbúar Parísar sem og ferðalangar geta fengið sér hjól á einum 750 Velib stöðvum um alla París og skilið þau eftir á einhverri annarri stöð í borginni.  Í lok árs 2007 er áætlað að stöðvarnar verði orðnar tæplega 1500 og hjólin rúmlega 20.000.

Nokkur "ferðaboðorð"- frá Arthur Frommer

- Hringdu aldrei úr síma hótelsins, skiptu aldrei peningum á hótelinu og láttu aldrei þvo af þér þar. Öll þessi atriði eru afar dýr og aðeins í boði til að hótelin geti lagt mikið á þau.

- Skiptu peningum í t.d. hraðbanka/banka, notaðu farsíma eða almenningssíma og finndu "þvottahús" til að þvo fötin.

- Ekki nota "skiptistofur" á götum úti til að skipta peningum - finndu heldur banka - því stærri því betra, því þeir hafa hagstæðasta gengið.

European Boating Holidays

Ferðalangur hafði spurnir af nýlegu bresku fyrirtæki, European Boating Holidays, sem býður siglingar á leigubátum um skurði, ár og vötn í Evrópu. Fyrirtækið ku vera annað stærsta fyrirtækið á þessu sviði og býður báta í Frakklandi, Hollandi, Ítalíu, Írlandi, Póllandi og í Þýskalandi.

Nánari upplýsingar:
http://www.europeanboatingholidays.co.uk/

Höfuðborgir landa heims

Hafið þið einhvern tímann spurt sem svo: "Hvað eru mörg lönd í heiminum?" Áreiðanlegustu heimildir herma að þau séu nú 195 talsins. Á landafræðisíðu frá About.com má sjá hvaða lönd þetta eru og hverjar eru höfuðborgir þeirra.

Uppskeru- og þorpshátíðir haustsins á Ítalíu

Haustið er frábær tími til að sækja Ítalíu heim, einkum og sér í lagi vegna litríkra þorpshátíða og uppskeruhátíða (Vendemmia) sem haldnar eru á þessum tíma.

Að þessu sinni (2007) hefst uppskeran óvenju snemma, hefur ekki verið fyrr á ferðinni s.l. 30 ár vegna hitanna í sumar.

Þó að Toscana sýsla (Chianti héraðið) sé líklega þekktasta vínhérað Ítalíu út á við, þá er það Veneto sýsla sem framleiðir mesta vínmagnið á Ítalíu og þar á eftir fylgja Puglia, Sikiley og Emilia Romagna.

Vínhátíðirnar eru margar og má þar nefna Vino al Vino í þorpinu Panzano í Chianti héraði (milli Flórens og Siena) sem haldin er árlega þriðju helgina í september.

Í Piumonte sýslu í Asti (kannist þið ekki við Asti Spumante?) er hin árlega Douja d'Or hátíð og í Impruneta í Toscana er Festa dell'uva.

Við Gardavatnið hýsir þorpið Bardolino hið þekkta Bardolino Grape Festival í lok september.

Af nógu er að taka og á vefsíðu Frommers.com má lesa meira um þorps- og vínhátíðir í greininni How to Be a Part of Italy's Autumnal Wine Harvest