Ferðalangur

Hvernig geta konur minnkað líkur á að verða rændar erlendis?

Journeywoman heitir vefsíða sem helgar sig ferðalögum kvenna víða um heim. Á einni síðu þeirra, An Expert's Safety Tips for Female Travellers, eru nokkur heilræði fyrir konur sem vilja gjarnan minnka líkurnar á að lenda í klónum á vasaþjófum á ferðum sínum um ókunnar slóðir.

Á síðunni er m.a. mælt með því að konur klæðist svipuðum fötum og aðrir þarlendir vegfarendur, að þær séu ekki í þröngum, áberandi fötum (!), beri poka með merki nálægrar matvörubúðar eða stórmarkaðar (og geymi jafnvel myndavélina þar...) o.s.frv. Fróðleg lesning og eitthvað til að velta fyrir sér.

Fleiri flugleitarvélar í ferðastiku Ferðalangs

Nú hafa bæst við nokkrar öflugar flugleitarvélar í ferðastiku Ferðalangs, t.d. Momondo, Mobissimo og Kayak svo eitthvað sé nefnt. (Ertu búin/nn að hlaða niður ferðastikunni?)

Þeir sem leita að framhaldsflugi frá einhverjum áfangastöðum, hvort heldur er innan Evrópu eða til Bandaríkjanna, ættu að hafa í huga að það getur margborgað sig að leita í nokkrum völdum flugleitarvélum og bera saman verð á flugmiðum. Þó ber að hafa í huga að ekki er alltaf hægt að kaupa flugið á netinu... það fer eftir því hvort síðurnar taka við íslenskum kreditkortum og einnig hvort gefinn er út rafrænn flugmiði því aðrir miðar eru ekki alltaf sendir til Íslands.

Það er því að mörgu að hyggja en þegar umtalsverðir fjármunir eru í húfi, eins og t.d. fyrir löng og dýr framhaldsflug, getur borgað sig að eyða svolitlum tíma í að gramsa á netinu.

Íbúð í Berlín

Íslensk hjón vilja vekja athygli á íbúð sem þau geta leigt íslenskum ferðalöngum á besta stað í Berlín. Slóðin er: www.simnet.is/tabla og þar stendur m.a.:

"Íbúðin er í Lychener strasse í Prenzlauer Berg sem er líflegt og vinalegt hverfi og tilheyrir hinum gamla borgarhluta Berlínar. Flest húsin í hverfinu eru fallega uppgerð í gamla andanum og þau hreinlega skína af nýrri málningu. - Í hverfinu er mikið úrval af skemmtilegum verslunum, börum, kaffihúsum og klúbbum. Um leið og komið er út úr íbúðinni er gengið inn í fjölbreytt og áhugavert mannlífið. Frábær bakarí eru í næsta nágrenni."

London: Kort og hlaðvörp (podcasts)

Á síðunni VisitLondon.com er hægt að finna margt nýtilegt fyrir ferðalanga í London. Þar má m.a. nefna eftirfarandi kort og bæklinga:

- Neðanjarðarlestarkerfið í London - London Tube Map
- Strætó, neðanjarðarlestir og lestir í London og nágrenni - Bus, tube and rail
- Samgöngur í London - Transport for London

Einnig er hægt að njóta þess að hlusta á hlaðvörp - "podcasts" þar sem gengið er um mörg skemmtileg hverfi í London s.s. Kew, Dulwich, Primrose Hill og Canary Wharf: http://www.visitlondon.com/maps/podcasts

Íbúðir í stað hótelherbergja?

Sumir kjósa að leigja íbúð í nokkra daga í stað þess að dvelja á hefðbundnu hóteli. Það getur verið góður valkostur, t.d. fyrir fólk með börn eða þá sem kjósa að hafa frjálsari hendur með morgunmat og aðrar máltíðir dagsins. Loks er oft ódýrara að dvelja í íbúð ekki síst ef nokkrir leigja hana saman.

Hér fyrir neðan koma nokkrar vefsíður sem gott er að kíkja á í þessu sambandi.