« ágúst 2008 | Aftur á aðalsíðu | október 2008 »
"Burt með túristann"
Hafið þið ekki stundum tekið myndir á merkilegum og frægum stöðum og óskapast yfir öllum "túristunum" sem þvælast fyrir á myndunum? Nú er komin lausn á því þó Ferðalangur sjálfur hafi ekki prófað enn :-). Tourist Remover heitir það og er hluti af þjónustu (ókeypis) sem vefsíðan Snapmania.com veitir en þar er hægt að geyma myndir á vefnum (100 mb ókeypis) og skipuleggja þær og raða.
Þið takið nokkrar myndir af viðfangsefninu, hlaðið þeim inn á ykkar svæði hjá Snapmania.com og Tourist Remover blandar þeim saman og lætur "túristana" hverfa. Áhugasamir geta skráð sig fyrir eigin notendasvæði hér: https://my.snapmania.com/en/signup/.
september 17, 2008 in Handbók Ferðalangs | Prentvænt
Viltu kaupa hús á Sikiley fyrir eina evru?
Þær fréttir berast að bæjarráðið í bænum Salemi á Sikiley ætli að selja 3700 hús, sem skemmdust í jarðskjálfta fyrir 40 árum, á eina evru til þeirra sem eru tilbúnir að gera þau upp á tveimur árum!
Þetta er liður í tilraun til að hleypa nýju lífi í bæinn sem er miðaldabær og gegndi veigamiklu hlutverki í viðleitni Giuseppe Garibaldi til að sameina Ítalíu og var raunar fyrsta höfuðborg Ítalíu árið 1860.
Húsin, sem skemmdust í jarðskjálfta fyrir 40 árum síðan, hafa ekki verið endurbyggð né búið í þeim síðan þá. Þau standa í gamla bæjarhlutanum og eru eign bæjarins.
september 15, 2008 in * Ítalía | Prentvænt
Að drekka síðdegiste í London
Það að setjast niður milli 3-5 síðdegis og fá sér tesopa og "með því" er svona um það bil sá enskur siður sem gæti talið "enskastur" ... Myndin hér til hliðar er frá Ritz hótelinu en síðdegissopinn gerist vart flottari en einmitt þar.
Ef þú ert í sporum ferðalangsins og hefur t.d. þrammað um stræti London, inn og út úr verslunum og söfnum, þá áttu einfaldlega skilið að setjast niður og fá þér góðan tebolla. Þú mátt eiga von á góðu úrvali tetegunda, litlum samlokum þar sem búið er að skera skorpuna af, heitum skonsum með rjóma og sultu, úrvali af kökum, smákökum og öðru slíku sætmeti.
Besti staðurinn í London til að fá sér te er auðvitað Buckingham Palace en það er líklega þrautin þyngri að verða sér úti um boð í garðpartíin þar.
Flottustu hótelin í London eru fræg fyrir síðdegistesopann - t.d. Ritz, Savoy og Waldorf hótelin en verðið þar er eftir því. Hinsvegar er ógleymanlegt að leyfa sér að upplifa stemninguna svona einu sinni...
Hér fyrir neðan eru dæmi um nokkra vel valda staði þar sem hægt er að njóta þess að setjast niður og fá sér síðdegiste í London:
Victoria og Albert Museum
Þetta var fyrsta safnið í heiminum til að bjóða upp á te og kaffiaðstöðu og umhverfið ekki amalegt fyrir fagurkera!
Heimilsfang: Cromwell Road, London SW7 2RL.
Neðanjarðarlestarstöð: South Kensington
*******
Fortnum and Mason
...þar sem Elísabet drottning kaupir inn... ekki kannski sjálf en hennar fólk :-).
Verslunin var stofnuð 1705 og er enn á sama stað. Þarna eru 4 veitingastaðir, nýuppgerðir og hægt er að fá síðdegiste á St. James' restaurant frá 2 - 7.
Snjallt væri að bóka daginn áður - því oft er mjög þéttsetinn bekkurinn og ef þú ætlar að setjast niður á laugardegi þarftu að bóka með nokkurra vikna fyrirvara.
Heimilisfang: 181 Piccadilly, London W1A 1ER
Neðanjarðarlest: Piccadilly Circus eða Green Park
*******
Waterstones Piccadilly
Stærsta bókaverslun í Evrópu er ágætis stefnumótsstaður í miðri London. Útsýnið af 5. hæðar barnum er stórfenglegt og sést yfir þinghúsið og London Eye. Það má taka með sér bók og fletta í henni yfir kaffinu þó hún hafi ekki verið keypt.
Heimilisfang: 5. hæð, Waterstones, 203-206 Piccadilly, London W1J 9LE.
Neðanjarðarlestarstöð: Piccadilly Circus eða Green Park
*******
Patisseriie Valerie
Í hjarta Soho er þessi vel geymdi staður. Hann er raunar meira eins og franskt kaffihús í Toulouse-Lautrec stíl... Það má líka láta duga að skoða í gluggana á þessu kaffihúsi og gefa bragðlaukunum kikk með því móti.
Heimilisfang: 44 Old Compton Street, Soho W1D 4TY
Neðanjarðarlestarstöð: Tottenham Court Road.
september 9, 2008 in * Bretland, Veitingastaðir | Prentvænt
Il Palio - kapphlaupið mikla í Siena
Á hverju ári, þann 2. júlí og 16. ágúst, þyrpist aragrúi fólks til ítölsku miðaldaborgarinnar Siena í Toskanahéraði á Ítalíu til að horfa á afar litríkar kappreiðar sem eiga sér forna sögu, Il Palio. Kappreiðarnar eiga sér stað á miðju aðaltorgi Siena, La Piazza del Campo sem þakin er mold og sandi af þessu tilefni.
Þarna keppa mismunandi borgarhlutar Siena sín á milli eftir ákveðnum reglum. Hrossin fara þrjá hringi um torgið og kapphlaupið sjálft tekur ekki nema ca. 90 sekúndur sem er ekki mikið þegar horft er til þess hve mikillar athygli atburðurinn nýtur í fjölmiðlum heima fyrir og erlendis. Dagarnir fyrir hlaupið eru að sjálfsögðu undirlagðir af gleði og spennu fyrir keppnina og ferðamenn í Siena á þessum tíma komast ekki hjá því að anda að sér þessu einstaka andrúmslofti.
Hér fyrir neðan má sjá stutt YouTube myndband af þessu einstæða kapphlaupi.
september 5, 2008 in * Ítalía | Prentvænt
Haust í Normandí
Haustið er góður tími til að heimsækja Normandí, t.d. þann hluta þess sem Orne heitir - a.m.k. heldur Brian Jackson því fram á vefsíðu Telegraph Travel í grein sinni: Normany: Land of mellow fruitfulness and Gallic Charms.
Á haustin fara sveppasafnarar af stað í skóginum Forest d'Écouves og njóta litadýrðar náttúrunnar sem skrýðist sínu dýrasta litaskrúði á þessum tíma.
Nú fer líka í hönd uppskerutími eplanna og gerð eplasafa (cider) ber höfuð og herðar yfir allt annað á þessum tíma. Eplasafinn er gerður úr litlum, súrum eplum sem heita m.a. tegundanöfnum eins og Antoinette, Calville og Noel des Champs. Eplasafi er konunglegur drykkur og Normannar hafa drukkið hann síðan á 11. öld.
Meira um Orne, eplasafa og Normandí.
september 4, 2008 in * Frakkland | Prentvænt
