Ferðalangur

Science Museum í London

Það er veruleg ástæða til að hvetja fólk á öllum aldri til að heimsækja Science Museum í London. Þar er eitthvað fyrir alla aldurshópa og ókeypis aðgangur.

Safnið stendur á bak við Natural History Museum, við Exhibition Road., London SW7. 

Fyrirtaks leiðarvísir um tvö söfn í París

Fyrir stuttu síðan kom út á vefnum ágætis grein frá Frommers.com sem lýsir bæði Louvre safninu og Musee d'Orsay í París: Why the Louvre and Musee d'Orsay are Paris' Best Museums.

Ferðalangur mælir eindregið með því að fólk gefi sér smá tíma til undirbúnings áður en svona stórkostleg söfn eru heimsótt - með því móti er hægt að fá mun meira út úr heimsókninni!

Vatikansöfnin

Eitt af mörgu sem freistar ferðalanga í Róm eru söfnin í Vatikaninu. Þá er snjallt að vera búin/nn að undirbúa sig svolítið fyrirfram og það er hægt með því að skoða t.d. vefsíðu safnanna:
http://mv.vatican.va/

Þar er að finna heilmikinn fróðleik um sögu safnanna o.fl. en skemmtilegast er þó að nýta sér Virtual Online Tour og skoða bæði listaverk og salarkynni í tölvunni í rólegheitum, t.d. Sixtínsku kapelluna, Etrúskasafnið o.fl.

Á vef Fodors.com er einnig hægt að kynna sér sögu safnsins í ágætri grein: Musei Vaticani.

Munið að klæðaburður skiptir máli - engar stuttbuxur og berar axlir...!

Skírlífi, næturgögn og páskahérar í München!

Í þýsku borginni München er afar skemmtilegt safn sem kallað er ZAM eða Zentrum für außergewöhnliche Museen sem þýða mætti sem miðstöð óvenjulegra safna.

Í safninu eru stöðugt í gangi 7 sýningar, þar á meðal 2000 eintök af koppum eða "næturgögnum", páskahérar í gegnum tíðina, "ilmsafn", hundruðir lása og þar með talin skírlífisbelti (!), og fleira.

Safnið er staðsett í nágrenni dómkirkjunnar, að Westernriederstrasse 41, milli Isator og Viktualienmarkt. Það er opið frá 10 - 6 daglega.

Ólívur og ólífutré

Hvað veistu um ólívur og ólífutré? Veistu, að ræktun ólífutrjáa hefur fylgt Miðjarðarhafslöndunum frá því á 4. öld fyrir Kristsburð og hefur haldist í hendur við stórmerkilega þróun menningar og mannlífs við Miðjarðarhafið?

Í þorpinu Imperia, sem liggur við strönd Liguríuhéraðsins á Ítalíu, er stórmerkilegt safn um hið sígræna ólífutré, sögu ólívuræktunar og vinnslu - Museo dell'Olivo. Yfir 30.000 manns heimsækja safnið árlega og vefsíða þess veitir einnig innsýn í þetta merkilega safn.

Fræg söfn í London - ókeypis inn

Hér koma nokkrar vefsíður þekktra safna í London þar sem ekkert kostar inn:

The British Museum  - www.thebritishmuseum.ac.uk
The National Portrait Gallery - http://www.npg.org.uk/
The National Gallery og The Natural History Museum - www.nhm.ac.uk
The Victoria & Albert Museum - http://www.vam.ac.uk/
The Science Museum - www.sciencemuseum.org.uk
The Imperial War Museum - www.iwm.org.uk
The Tate Modern - www.tate.org.uk

Wartburgkastali í nágrenni Eisenach

"Wart' Berg, Du sollst mir eine Burg werden..."… Sögur herma að þessi fræga setning hafi verið upphafið að byggingu Wartburgkastala,en það var Ludwig der Springer greifi sem þetta mælti árið 1067 þegar hann var á veiðum og sá til fjallsins þar sem kastalinn stendur í dag.

Hvað skyldu þau Elísabet prinsessa af Ungverjalandi, Martin Luther og tónskáldið Richard Wagner eiga sameiginlegt? Jú - öll koma þau við sögu, þó á ólíkan hátt sé, þegar Wartburgkastala ber á góma.

Neanderdalsmaðurinn í Frakklandi

Opnað hefur verið afar óvenjulegt og skemmtilegt "safn" Paleosite í Saint-Césaire, 140 km norður af Bordeaux í suðvestur Frakklandi, sem gefur innsýn í líf Neanderdalsmannsins.

"Big Pit" - safn ársins 2005 í Bretlandi

Big Pit: National Mining Museum í Wales er raunveruleg kolanáma og vann árið 2005 hin eftirsóttu Gulbekian verðlaun sem safn ársins í Bretlandi.

Gestir fá tækifæri til að ferðast 300 fet undir yfirborð jarðar með leiðsögumanni sem vann áður fyrr sem verkamaður í námunni og segir frá reynslu sinni af því.

Big Pit er hluti af svæðinu Blaenafon Industrial Landscape sem er á heimsminjaskrá UNESCO - en svæðið gegndi veigamiklu hlutverki í iðnbyltingunni í Bretlandi. Safnið heimsækja um 150.000 manns á ári og er aðgangur frír.

Upplýsingar um Wales:
http://www.visitwales.com/

Skemmtilegustu kastalar í Evrópu...

...skv. Travelchannel.com, eru eftirfarandi: Castelo de Sao Jorge (Lissabon, Portúgal), kastalinn í Prag, Brodick kastali (Isle of Arran, Skotlandi), Chambord kastali (Louvre, Frakklandi), Neuschwanstein kastali (í nágrenni München, Þýskalandi), Lincoln kastali (Lincolnshire, Englandi), Glamis kastali (Glamis, Skotlandi), Mont Saint Michel (í nágrenni Normandi, Frakklandi), Frankenstein kastali (Darmstadt, Þýskalandi) og Leeds kastali (Kent, Englandi).

Lesið afhverju -  í greininni Best European Castles eftir Lindu Allman.

Uffizi safnið í Flórens

Ef ætlunin er að heimsækja Uffizi safnið í Flórens, gæti verið gaman að undirbúa slíka heimsókn með því að skoða hinn opinbera vef Uffizi safnsins. Þar er hægt að skoða upplýsingar um sýningarsali og listamenn og síðast en ekki síst myndir af mörgum listaverkum safnsins.

Upplýsingar um opnunartíma safnins eru á síðunni, þar sem m.a. kemur fram að safnið er lokað á mánudögum. Einnig er hægt að kaupa miða í safnið á síðunni og hugsanlega spara sér biðraðir á staðnum með því móti.

The British Museum

Internetið hefur marga kosti - og einn þeirra getur verið sá að gera ferðir á söfn enn áhugaverðari og meira spennandi en ella.

Heimasíða The British Museum í London, opnar fólki svo sannarlega leið inn í forna, löngu liðna tíma. Á henni er upplagt að átta sig á uppbyggingu þessa mikla safns, skipuleggja hugsanlega heimsókn,  skoða menningu frá mismunandi heimshlutum og fræðast.

Aðgangur að hefðbundnum sýningum í The British Museum er ókeypis.

The British Museum
Bretland - Yfirlit

Uppfært október 2010

Louvre á netinu

Fyrir þá sem hyggja á skoðunarferð um Louvre safnið í París - hvort heldur í raunveruleikanum eða einfaldlega bara í sófanum heima er upplagt að kynna sér Louvre á netinu.

 
Á vefnum er ógrynni upplýsinga. Hægt er að lesa um sögu Louvre safnsins þar sem stiklað er á stóru um þessa 800 ára gömlu byggingu sem hýst hefur safnið undanfarnar tvær aldir.  Einnig er hægt að fara n.k. “sýndarferð” um safnið (virtual tour). Ferðinni er heitið í gegnum hin ýmsu söfn Louvre, þar sem meðal annars er hægt að sjá egypska fornmuni og einnig muni frá tímum Forn-Grikkja, Rómverja og Etrúska.

 

Sérlega skemmtilegt er að skoða valin verk (Selected Works) frá mismunandi tímabilum með skýringum  -  t.d. Monu Lisu, öðru nafni “La Gioconda”, eftir Leonardo da Vinci og verk eftir Raffaello.

 

Á vefnum eru að sjálfsögðu praktískar upplýsingar um sérsýningar sem í gangi eru, opnunartíma, miðaverð og fleira. Þetta er vefur sem er í senn bæði skemmtilegur og fræðandi.

 

Ofurlítið heilræði:
Ef safnið er heimsótt í París, mæli ég með því að taka einungis fyrir hluta þess í einu - þetta er svo viðamikið safn að það er ekki nokkur leið að skoða það af viti á 2-3 tímum.